KUCHING: Sarawak naka kemari agi ngerikodka 677 kes positif COVID-19 berindik ari nadai kes baru diripotka.
Sapit Kepala Menteri, Datuk Amar Douglas Uggah Embas mega madahka kemari bisi enam kes baru udah gerai sereta dikemendarka pansut ari sepital.
“Sehari tu nadai kes positif COVID-19 baru diripotka. Tu nyadika penyampau semua kes positif COVID-19 di Sarawak agi 677 kes.
“Bisi enam kes baru udah gerai sereta dikemendarka pansut ari Sepital Besai Sarawak sehari tu sereta sida tu asal ari Pelilih Menua Kuching enggau Pelilih Menua Samarahan.
“Tu nyadika penyampau semua kes positif COVID-19 ke udah gerai sereta dikemendarka pansut ari sepital naka ke sehari tu (kemari) bisi 571 iku tauka 84.34 peratus,” ku Uggah ti mega Chairman Komiti Mutarka Penusah Ngenyit Nengeri Sarawak ba aum pengarang berita COVID-19 Sarawak, kemari.
Nambahka nya iya madahka bisi 87 iku agi benung diperubatka ba wad isolasyen sepital sereta penyampau ke bebadi nyadi ketegal COVID-19 agi 19 iku tauka 2.81 peratus.
Kemari bisi semilan PUI baru diripotka enggau dua kes agi nganti pemutus makmal.
“Sampel ke diambi maya ngiga kontak enggau pengawa matau , bisi 1,182 agi nganti pemutus makmal,” ku iya.
Bisi 36 PUS ti ngerejista masuk sereta dikuarantin ba hotel kemari, ti nyadika penyampau semua PUS ba 11 buah hotel bisi 683 iku.
Kelimpah ari nya iya madahka naka kemari bisi 10 kluster ke agi aktif iya nya Kluster Syarikat Kejuruteraaan (agi lapan kes); Kluster Mambong (agi tujuh kes); Kluster Pusat Perubatan (agi tiga kes); Kluster Jupiter (agi tiga kes); Kluster Pasar Stutong (agi tujuh kes); Kluster Jeti Kuching (agi dua kes); Kluster Sentosa (agi 31 kes); Kluster PUI Melbourne (agi tiga kes); Kluster Syarikat Pembinaan Kuching (agi dua kes) enggau Kluster Pasar Satok (agi empat kes).
Sama bisi ba aum pengarang berita nya kemari, Menteri Kaunsil Kandang Menua enggau Pengawa Berumah Dato Sri Dr Sim Kui Hian enggau Direktor Opis Pengerai Nengeri Sarawak Dr Cin Zin Hing.