BINTULU: Bisi 24 iku pesereta ari selampur nengeri tu nyereta Program Inkubasyen Agrodagang (PIU) ti diatur Universiti Putra Malaysia Kampus Bintulu (UPMKB) empai lama ti udah.
Pengawa bejadika program nya udah diatur ba Dewan Kuliah Palan 2A UPMKB ti digulu Direktor Kampus UPMKB iya nya Profesor Dr Bujang Kim Huat, Koordinator Program Inkubasyen Agrodagang Profesor Madya Dr Ong Kian Huat, Ketuai Taman Bertanam Betupi Universiti Nalong Buda enggau koordinator modul.
Pengawa bejadika program tu mega nitihka pentin Atur Nagang Pemindah Mulaika Pemanah (PKPP) enggau ngemeranka garis lalau enggau tusun atur nagang COVID-19 ti ditetapka UPM seriris enggau Prosedur Operasyen Standard (SOP) ti dibantaika perintah, Kaunsil Pengelikun Menua (MKN) enggau Opis Pengerai Malaysia (KKM).
Nitih ku pengari pemadah UPMKB, program nya udah dipejalaika kenyau taun 2018 di UPMKB disukung penuh ari Palan Pemansang Orang Dagang enggau ‘Kebolehpasaran’ Graduet (CEM) enggau Opis Menteri Pelajar Tinggi Malaysia (KPT).
“Program nya udah dipelanja penuh nengah agih belanja ti diberi raban KPT. Ba taun 2018, bisi dua modal ti disediaka iya nya Modal Nupi Manuk Kampung Hibrid enggau Modal Nanam Buah Semangka Batu Nengah Fertigasyen,” ku penerang UPMKB kemari.
Lalu ba taun 2019 ku iya, dua modal mega disediaka iya nya Modal Nupi Manuk Kampung Hibrid enggau Modal Nupi Ikan Dalam Sangkar.
Ku iya nerang, objektif besai program PIU iya nya deka ngadaka mayuh agi orang dagang baru dalam bidang betanam betupi enggau program tu iya nya siti program baru ti keterubah dipejalaika di UPM.
Kelimpah enggau nya ku iya, tuju ke bukai iya nya kena nyendiaka pelasar alternatif ngagai graduet ngambika ulih mungkur diri enggau pengawa dagang, nampung pelajar ke renggat lebih tinggi, ngembuan mayuh peneleba gawa enggau nerenak pengeransing bedagang dalam pengawa betanam betupi.
Ba awak ke sama ku iya, juluk tu mega ulih nyungkak penatai pemisi nengah numbuhka kompeni.
Taun tu ku iya, PIU UPMKB diatur kenyau 13 Julai 2020 enggau disadang tembu kena 11 Disember 2020 enggau penyampau penyereta 24 iku ari selampur Sarawak.
Ku iya nambah, program taun tu dibagi ngagai tiga modul iya nya Modal Nanam Buah Semangka Batu Nengah Fertigasyen, Modal Nupi Manuk Kampung Hibrid enggau Modal Nupi Ikan Dalam Sangkar.
“Tetiap modul tu mungkur lapan pesereta ti deka dilatih pengelama lima bulan enggau program ke bisi nyengkaum licha pansik enggau ‘praktikal’ ari pengelicha ari UPMKB,” ku iya.