Anda di sini

213 buah sekula deka ditangguh sesi P&P ngagai 17 Ogos

Advertisement

KUCHING: Gempung Gerempung Pengajar Bumiputera Sarawak (KGBS) ngarapka pengajar enggau apai indai ulih nerima pemutus perintah Sarawak ti nangguhka pengawa muka baru sesi ngajar enggau belajar (PnP) 213 buah sekula ari baruh Opis Pelajar Pelilih Menua (PPD) Kuching, Padawan enggau Samarahan ngagai 17 Ogos 2020.

Presiden KGBS, Ahmad Malie madahka KGBS empu nerima pemutus nya sereta arap bendar sebedau pekara nya ditetapka, perintah nengeri dilalau sida ti bekaul.

“KGBS arap bendar perintah Sarawak ngaga pemutus tu pengudah nerima penemu enggau lalau ari Opis Menteri Pengerai Malaysia enggau Kaunsil Pengelikun Menua, ti ketegal pandemik COVID-19 berampit baru ba tiga kandang endur tu kenyau beberapa hari ke udah.

“Nya alai, KGBS ngarapka bala pengajar enggau apai indai sereta penyaga nembiak ulih sama nitih sereta nerima enggau lantang ati pekara ti dipadahka perintah tu.

“KGBS ngarapka apai indai sereta penyaga terus matau sereta ngenukaka pengerai anak,” ku iya madah ngagai Utusan Borneo.

Taja pan pekara nya udah ditetapka perintah nengeri, KGBS arap bendar raban pengajar ba sekula ti bekaul agi sereta terus ransing bejalaika sesi ngajar ngena chara online tauka enda ngira nama chara ke dikena.

KGBS madahka, pengeransing deka neruska sesi belajar ngena chara online ari rumah tauka enda ngira nama chara ti pemadu manah sepamanjai timpuh ke ditangguh nya amat beguna kena nentuka  pelajar nembiak enda tekeruga.

“Nya alai, KGBS meri puji enggau terima kasih ketegal komitmen tinggi bala pengajar maya betapi enggau gaya diatu ke chukup mar,” ku iya.

Ensanus, Komiti Mutarka Penusah Ngenyit Nengeri Sarawak (JPBNS) udah ngemutuska sesi muka baru 213 buah sekula ti nyengkaum Sekula Primari (SR) Primari 1 ngagai Primari 6 enggau Sekula Sekondari (SM) Kelas Peralihan, Form 1 ngagai Form 4 sereta Form 6 Baruh ke ari baruh Opis Pelajar Pelilih Menua (PPD) Kuching, Padawan enggau Samarahan deka ditangguh sereta dilanjarka ngagai 17 ogos 2020.

“JPBNS ngemutuska iya nya sesi sekula baru 164 buah SM enggau SR ba pelilih menua Kuching, Padawan enggau Samarahan ke sebedau tu dipadah berengkah dibuka baru kena 3 Ogos 2020 deka ditangguh sereta dilanjarka ngagai 17 ogos 2020.

“Kelimpah ari nya, pengawa nangguhka sesi sekula dikerembaika ngagai 25 buah sekula di pelilih menua Padawan enggau 24 buah sekula di pelilih menua Samarahan ti mungkur Kelas Peralihan, Form 1, 2, 3 & 4, Form 6 Baruh enggau SR Primari 1, 2, 3, 4, 5 & 6.

“Nya alai naka ke diatu pengawa nangguh enggau ngelanjarka sesi muka baru sekula ti nyengkaum ba pelilih menua Kuching, Padawan enggau Samarahan iya nya mungkur 213 buah sekula,” ku JPBN, ensanus.

  • oleh
  • Advertisement