Anda di sini

Semua ejensi baruh JPBBM udah nyikap diri napi penusah ngenyit

Advertisement

MIRI: Semua ejensi ba baruh Komiti Mutarka Penusah Ngenyit Bagi Menua Miri (JPBBM) diatu benung nyikap diri kena napi penusah ngenyit berindik ari ubah gaya hari.

Menteri ti megai tanggungpengawa, Datuk Lee Kim Shin madah, ejensi ti bekaul nyengkaum Raban Penyaga Pengelikun Periman (APM) Bagi Menua Miri, Opis Bomba enggau Penyelamat Malaysia (JBPM) udah dipinta besedia enggau proaktif kena nentuka mensia mayuh ba gaya ti likun enggau enda tekeruga.

Lee ke mega Menteri Perengka Pengangkut Sarawak madah, iya enggai peranak ba bagi menua tu tekeruga ketegal penusah ngenyit baka ti nyadi kena 23 Julai nyin tadi, ngujungka mayuh pengerusak ba reta tengkira.

“Kami minta Opis Ngemataka Gaya Hari Miri meri penerang ti tumu ngagai mensia mayuh kena besedia napi sebarang penusah ngenyit enggau penusah ti enda disadang nyadi ketegal ubah gaya hari enggau ai pasang besai.

“Penusah ampuh bah tunggal ti nyadi ba mengeri Miri kena 23 Julai iya nya dipelabaka ketegal penatai remang ujan ke betumpuk aktif ti ngujungka ujan bangat disempulang enggau ribut kudi,” ku iya maya nyadi chairman Aum Mutarka Penusah Ngenyit di Bilik Aum Komplek Islam Sarawak, kemari.

Aum nya ti digulu semua opis enggau ejensi ba baruh Komiti Mutarka Penusah Ngenyit Bagi Menua Miri laban ti mantaika ripot ari tetiap ejensi sereta berundingka aksyen nangkanka nya ti dipejalaika komiti bekaul enggau penusah ampuh bah tunggal ketegal ribut ti balat nyadi disempulang enggau ujan bangat sereta ai pasang.

Ujan bangat ti disempulang enggau ribut kudi ba hari nya mega ngujungka siling Dewan Suarah Miri labuh ketegal panchur ai ujan ti bisi enda ulih nangkup penyampau ai ujan ti mayuh ngujungka panchur nya pechah.

“Pengawa meresa tumu ari Opis Kereja Raya (Miri) melabaka ungkus lebih RM1 juta dikena nyeruri enggau ngaga baru struktur siling ti jai, nyambung tali karan baru, ngemanah lif, ‘air-cond’, nukar karpet enggau geladak baru, meli kereban opis sereta ngangkatmanah baru struktur begunan.

“Raban APM enggau Bomba udah diasuh bejalaika pengawa meresa enggau silik lif, nyambung tali karan enggau mansik begunan kena ngenukuka sekalika begunan agi likun dikena mensia mayuh tauka enda,” ku Lee.

Kelimpah ari nya, beberapa kandang menua ke bukai ti dituntung penusah ampuh bah iya nya mengeri besai Miri, Dewan Suarah Miri, Balai Bomba enggau Penyelamat Miri, Jalai Miri - Pujut (Ba mua Balai Bomba enggau Penyelamat Miri), Jalai Miri - Pujut (Kampung Lereng Bukit), Jalai Merbau (ba mua Meritz Hotel), Jalai Tanjung Lobang, Taman Tai Poo, Jalai Sibu, Jalai Miri enggau Jalai Durin di Taman Tunku, Taman Seroja enggau Jalai Pos.

Kelimpah enggau nya, Begunan Balai Bomba enggau Penyelamat Miri ti bepalan ba kaki Bukit Kanada mega dituntung penusah ampuh bah ti balat berindik ari penyampau ai ujan bangat ti rarat ari parit besai ti semak enggau begunan.

Naka ke diatu, Opis Kaunsil Mengeri Miri udah mansutka siti notis jaku gerah madahka pengawa nutup Librari Mensia Mayuh ti bepalan ba Dewan Surah Miri berengkah 24 Julai 2020 seraya nganti kereja ngemanah tembu dipejalaika.

Penusah ribut ti balat nyadi ti diripot di Pasar Batu Niah kena 23 Julai 2020 udah ngujungka sekeda atap rumah peranak enggau begunan sereta premis dagang rusak kelimpah bekal elektrik tejanggal ba ngelingi kandang pasar Batu Niah.

Penerang ari Opis Pengintu Pengelantang Raban Bansa Nengeri Bagi Menua Miri iya nya dua buah rumah panjai iya nya Rh Agan enggau Rh Andrew di Niah mega diripotka jai ketegal ribut, enggau diatu eksyen nangkanka nya udah diambi Opis Pengintu Raban Bansa.

Advertisement