SRI AMAN: Perintah Sarawak udah bejalaika Projek Taman Industri Sri Aman enggau pemesai 5.5 hektar nengah dua renggat ti bepalan ba pasar Sri Aman ditu.
Nitihka Sapit Kepala Menteri, Datuk Amar Awang Tengah Ali Hasan madahka, projek nya udah dikemendar dalam Atur Pemansang Malaysia Lumpar Ke-11 (RMK-11) ngagai opis menteri nya enggau tuju dikena mantu pedagang mit enggau tengan pemesai (PKS) kelebih agi di Sri Aman bejalaika aktiviti dagang sida.
Ku iya, ba renggat keterubah ngaga projek nya mungkur 21 lot, ke alai endur nya bepalan urung 20 kilometer ari pasar Sri Aman, udah tembu endar kena bulan September 2019 taun nyin tadi.
“Projek nya dipejalaika enggau kunterik beungkus lebih ari RM5 juta,” ku iya nerang.
Ku iya baru, ungkup renggat kedua tauka fasa kedua, projek ti mekuh ngagai pemansang infrastruktur enggau perengkaguna pemun baka parit, jalai, ai, telekomunikasyen sereta elekterik nengah kunterik beungkus lebih ari RM8.9 juta.
“Projek kedua tu disadang tembu dalam bulan September 2021,” ku iya ba aum media pengudah ngabas ngagai Taman Industri Sri Aman ditu.
Berebak enggau nya, Awang Tengah ngarapka projek ti benung dipejalai ba renggat kedua nya ulih tembu nitihka timpuh ke udah ditetapka.
“Penembu kereja ngaga kededua renggat projek nya dikearap ulih nyendiaka taba ungkup raban pedagang woksyop beoperasyen dalam siti palan besai ba siti palan ti dikelala Industri Estate laban diatu palan nya bepambar, pedagang bisi ke besepiak enggau kedai sereta ba rumah diri,” ku iya nerang.
Sama bisi datai ba pengawa ngabas taba nya, Menteri Muda Pengelantang Komuniti ke mega Kaban Kunsil Nengeri (ADUN) Simanggang, Datuk Francis Harden Hollis, Menteri Muda Terminal Industri ke mega ADUN Batang Ai, Datuk Dr Malcolm Mussen Lamoh, Sekretari Mendam MINTRED, Datu Liaw Soon Eng, Residen Bagi Menua Sri Aman, Indit Bangai sereta bala ke bukai.