SIBU: Menteri Muda Kaunsil Kandang Menua enggau Pengawa Berumah Dr Annuar Rapaee madahka pemutus perintah menua ti netapka mesti ngena sengkabung idung enggau mulut lebuh ba palan mensia mayuh, endang siti atur ti engkeman dikena ngemunaska pengelekai COVID-19.
Nitih ku iya, semua pekara tu chukup beguna berindik ari penerang ari Gerempung Pengerai Sedunya (WHO) ti madahka virus COVID-19 ulih ngelekai sereta berampit nengah angin.
“Belalauka pansik WHO, virus tu ulih tan ba angin pengelama 8 jam. Nya alai, mensia mayuh patut ngena sengkabung idung enggau mulut lebuh mindah ngagai sebarang endur. Tu siti atur ke engkeman ti udah ditetapka perintah.
“Mayuh entara sekeda menua ke bukai ti udah ngepunka atur tu (ngena sengkabung idung enggau mulut ba palan mensia mayuh). Kebendar, aku udah mantaika langgur tu kena 12 Julai empai lama, bekaul enggau pematut semua orang ke patut ngena sengkabung idung enggau mulut lebuh ba palan mensia mayuh.
“Aku deka nandu jaku gerah tu ngagai semua palan dagang sekalika restoran, kedai kopi tauka palan bebelika barang, enda tau ngemendarka sesapa aja ti enda sengkabung idung enggau mulut tama ke dalam kedai sida,” ku Dr Annuar ke mega Menteri Muda Pelajar enggau Pansik Teknologi sereta Kaban Kunsil Nengeri (ADUN) Nangka.
“Ungkup bala ke enda ulih meli tauka ngena sengkabung idung enggau mulut ke patut, sida tau ngaga kediri sengkabung idung enggau mulut nya.
Dr Annuar madah munyi nya kemari lebuh ditanya bekaul enggau Sarawak nitihka pemutus perintah besai ti ngemeranka atur pematut ngena sengkabung idung enggau mulut ba palan mensia mayuh, ba nengeri tu berengkah kena 1 Ogos tu.