KUCHING: Rayat Sarawak patut nyeliahka diri ari ngelawa ngagai palan mensia mayuh kelimpah seruran ngemeranka gaya pemeresi diri dikena nagang pengelekai COVID-19.
Menteri Kanan Infrastruktur, Datuk Seri Fadillah Yusof nyemetak sentang pekara nya madahka, kes COVID-19 di Sarawak kelebih agi Pelilih Menua Kuching enggau Samarahan majak niki.
“Nya alai, aku minta semua rayat di nengeri tu ngambika seruran ngemeranka gaya idup ti beresi enggau likun dalam pengawa ngemunaska rentayan pengelekai igi penyakit tu.
“Anang enda ingat mega, mesti suah nuchi jari dalam timpuh lebih kurang 20 saat,” ku iya nengah siti penerang ti dibantai ba laman ‘Facebook’ rasmi iya ditu, kemari.
Enti rayat enda ngemeratka amat pekara tu, Fadillah ke mega Menteri Kereja Raya madahka, gaya tu deka meri empas ti balat ngagai ekonomi menua.
“Pengidup kitai iya nya penatai pemisi ninting hari kitai udah tentu deka tekeruga. Kitai enggai meda rayat kitai napi gaya ke baka tu.
“Nya kebuah, aku endang ngarap semua orang ulih meri kerejasama penuh dalam nagang COVID-19 ari majak ngelekai ba rayat,” ku iya enggau nyemetak.
“Pemutus ti digaga kitai diatu deka nentuka asil ba hari nya ila,” ku iya seraya minta rayat ngambika terus ba gaya likun.