Anda di sini

Pengawa ngemanahka parit ba semanjai Jalai Poh Yew deka diatur lengkas

 (Ari dua kiba) Tiong, Ting enggau Lau lebuh bejalai meresa sistem parit ba Jalai Poh Yew, ditu.
MERESA: (Ari dua kiba) Tiong, Ting enggau Lau lebuh bejalai meresa sistem parit ba Jalai Poh Yew, ditu.

SIBU: Chairman Opis Kaunsil Kandang Mengeri Sibu (SMC) Clarence Ting madahka pengawa dikena ngadu sereta ngemanahka parit ba semanjai Jalai Poh Yew berengkah ari Taman Li Hua deka berengkah dipejalaika enggau lengkas.

Ku iya, enti sema nadai penanggul ke bukai, pengawa ngemanahka parit ba Jalai Poh Yew deka ditembuka sebedau ujung taun tu.

“Kitai patut ngemanahka sistem parit ngambika ai nya pansut ngagai sungai ari Jalai Poh Yew ke Sungai Rajang ti semak, enda napi sebarang penanggul sereta deka lanchar,” ku iya.

Ting madah munyi nya ngagai pengarang berita pengudah iya bejalai meresa parit ba Taman Li Hua, pagi kemari.

Sama bisi datai iya nya Chairman Komiti Kejiranan Taman Li Hua Kapitan Peter Lau, penyanding penemu Penghulu Tiong Tung Loo enggau Mandal Komiti Mendam Servis Mensia Mayuh, Rampa Menua enggau Servis Kandang Mengeri SMC Jenny Ting.

Berindik ari tu, Ting madahka diri udah ngasuh Jenny ngemerat sereta ngaduka penanggul tu enggau lengkas.

Nangkanka nya, iya madahka diri tekenyit lebuh meda gaya sistem parit ba Jalai Poh Yew udah balat jai, lalu ambis nadai tiga bengkah palan ti ngembuan ai parit ke tepekul laban tanah tenggelam.

“Ketetiga bengkah palan tu deka dikemerat sereta diaduka dulu. Pengudah pengawa ngaduka palan nya tembu ila, aku pechaya sistem parit tu deka nyadi manah agi,” ku iya nambah.

Kelimpah ari tu, Ting udah madah ngagai Lau bekaul enggau semua sistem parit ba Taman Li Hua patut dikemanahka.

Ari perati Ting, sistem parit ti udah jai ba sekeda palan ba Jalai Maludan enggau Lane 6, Jalai Poh Yew mega patut diaduka enggau lengkas.

Advertisement