Anda di sini

Mensia mayuh dilalau seruran ngasika SOP, ku Sempurai

 (Ari kiba) Lau, Siaw, Sempurai enggau temuai dipebasa ke bukai matau tikas pengasi SOP ba Pasar Tamu Sibu Jaya kemari.
MATAU: (Ari kiba) Lau, Siaw, Sempurai enggau temuai dipebasa ke bukai matau tikas pengasi SOP ba Pasar Tamu Sibu Jaya kemari.

SIBU: Chairman Opis Pelilih Menua Pesisir Sibu (SRDC) Sempurai Petrus Ngelai ngansak mensia mayuh ngambika seruran ngasika Prosedur Operasyen Standard (SOP), ke atur enggau lalau ti udah dibantaika raban perintah dikena nentuka kitai ulih menang ngelaban pandemik COVID-19 enggau penyakit Rabies.

Nitih ku iya, semua orang patut nelebaka diri napi pengidup enggau ‘norma’ ke baru sereta anang kelalu rindang enggau pengidup diri taja bisi pengelunggar dalam timpuh Atur Nagang Pemindah Mulaika Penyuman (PKPP) tu.

Bepelasarka gaya penambah kes dirampit COVID-19 ti diripotka kemaya hari tu, mensia mayuh patut seruran bejejaga ngambika enda dirampit igi penyakit nya.

Ku Sempurai, raban pekereja ba baris mua udah berambun nyawa dikena nentuka semua orang likun ari ke dirampit virus COVID-19.

“Kitai patut ngenang pengawa ti udah dikereja sida (raban pekereja baris luan). Nengah awak tu, aku ngansak semua kitai ngambika bela meri kerejasama lalu seruran nitihka SOP, protokol enggau atur ti udah ditetapka dalam timpuh PKPP.

“Pengawa kitai ti ngelaban pandemik COVID-19 tu bedau abis, seagi vaksin enggau ubat ke engkeman dikena mutarka penanggul tu apin ditemu.

“Pelaba aku, nengeri Sarawak enggau mengeri Sibu deka napi empas gelumbang kedua COVID-19 enti kitai majak rindang sereta enda bekerejasama enggau pangan diri,” ku iya lebuh meri licha ba Program Nagang Pengelekai COVID-19 enggau Penyakit Rabies di Sibu Jaya, pagi kemari.

Senentang pekara ke bukai, Sempurai ngelalau orang ke bisi nginang ukui ba ditu ngambika seruran ngurung jelu tupi nya ba dalam kandang rumah sida lalu udah betuchuk vaksin anti-rabies.

“Kelimpah ari nya, sida patut nentuka jelu tupi nya ngembuan lisin ari SRDC. Tu endang udah tanggungpengawa orang ke ngempu jelu tupi nya.

“Anang ngelakka ukui nya bekedayau ba luar rumah,” ku iya nambah.

Sama bisi ba program tu iya nya Senator Dewan Rakyat Robert Lau, Residen Bagi Menua Sibu Charles Siaw, Pemangku Sekretari SRDC Teng Ming Min, raban Kunsilor, bala Ketuai Bansa enggau raban ke bukai.

Pengudah program nya tembu, sida bisi bejalai ngabas ngagai Pasar Tamu di Sibu Jaya.

Advertisement