Anda di sini

Semilan kes positif baru COVID-19 di Sarawak, ku Uggah

 Uggah ba aum pengarang berita COVID-19 Sarawak, seraya disempulang Dr Sim, kemari. — Gambar Chimon Upon
MERI PENERANG: Uggah ba aum pengarang berita COVID-19 Sarawak, seraya disempulang Dr Sim, kemari. — Gambar Chimon Upon

KUCHING: Bisi semilan kes positif baru COVID-19 diripotka ba Sarawak, ti nyadika penyampau semua kes positif COVID-19 iya nya 641 kes, naka kemari.

Sapit Kepala Menteri, Datuk Amar Douglas Uggah Embas madahka, semilan kes baru nya nyengkaum kes meresa orang ke baru pulai ari menua luar enggau ari pengawa nyidi kontak Kluster Sentosa.

“Sehari tu (kemari) bisi semilan kes positif COVID-19 baru diripotka. Kes nya nyengkaum enam kes di Pelilih Menua Kuching enggau tiga kes di Pelilih Menua Samarahan.

“Siti kes ngaul siku nembiak indu ke baru pulai ari menua Perth, Australia kena 20 Julai 2020 ari Kuala Lumpur ke Kuching, Sarawak. Kes diau ba menua Australia kenyau ari bulan Februari 2020.

“Maya datai ba Kuala Lumpur, enda diperesa ngena RTK Antigen laban iya udah beperesa COVID-19 ba Perth, Australia kena 17 Julai 2020 sereta pemutus nya negatif peresa rt-PCR COVID-19.

“Maya datai ba Kuching kes dibai sereta dikuarantin ba hotel lalu kena 21 Julai 2020 diperesa COVID-19 sereta pemutus rT-PCR ditemu positif kena 23 Julai,” ku iya ba aum pengarang berita COVID-19 Sarawak kemari madah, kes nadai ngayanka sebarang kelai.

Iya ti mega Chairman Komiti Mutarka Penusah Ngenyit Nengeri Sarawak madahka, kemari bisi lapan (8) kes baru diripotka ti bekaul enggau pengawa nyidi kontak kluster ke agi aktif.

“Semua (lapan) kes nya udah ditemu maya pengawa nyidi kes aktif ba semua kontak dalam Kluster Sentosa. Semua sida tu iya nya pekereja pengerai ba fasiliti nya ke diperesa kena 22 Julai 2020.

“Sida nya nyengkaum lima iku lelaki enggau tiga iku indu ti beumur entara 30 ngagai 48 taun. Semua kes tu nadai ngayanka sebarang kelai,” ku iya.

Berebak enggau tu, Uggah madahka Pelilih Menua Kuching ba renggat pandemik COVID-19 ke diatu dalam timpuh 14 hari semua kes positif bisi 38 kes sereta agi dalam kategori Zon Kuning.

Nambahka nya, iya madahka kemari penyampau kes udah gerai COVID-19 sereta dikemendarka pansut ari sepital agi 556 kes tauka 86.74 peratus, laban nadai kes baru diripotka.

Iya mega madahka bisi 67 iku agi diperubatka ba wad isolasyen sepital enggau penyampau bebadi nyawa ketegal COVID-19 mengkang 18 iku.

Ku iya, kemari mega bisi 18 PUI baru diripotka enggau lima kes agi nganti pemutus makmal.

Sama bisi ba aum pengarang berita nya kemari, Menteri Kaunsil Kandang Menua enggau Pengawa Berumah Dato Sri Dr Sim Kui Hian enggau Direktor Opis Pengerai Nengeri Sarawak Dr Chin Zin Hing.

Advertisement