Anda di sini

Perintah besai patut berundingka baru atur seraka sosial dalam bilun

OSCAR LING
OSCAR LING

SIBU: Kaban Parlimen Sibu Oscar Ling minta perintah besai ngambika mansik baru atur ngemeranka seraka sosial dalam bilun dikena nagang pengelekai COVID-19.

Oscar madahka, ari perati iya bedau lama udah, maya nepan bilun ari Kuala Lumpur ke Sibu enggau Kuala Lumpur ke Kuching, atur nya semina dititih maya ba terminal palan penerebai bilun.

“Di premis dagang enggau palan mensia mayuh, seraka sosial udah diteritka. Tang sayau, dalam bilun atur nya enda dikemeran.

“Nya alai, aku minta perintah besai neritka takah sosial dalam bilun berindik ari kes COVID-19 nyau bisi baru di menua tu nyengkaum Sarawak ti tebal agi iya nya ari kes import.

“Orang ti duduk ba sepiak nuan engka bisi COVID-19. Nyadi ba penemu aku nya chukup berisiko. Dalam kabin, kitai mega patut ngemeranka seraka sosial enggau ukai nya semina ba premis dagang sereta palan mensia mayuh, ku iya maya aum sidang media kemari.

Ling minta ngambika sida ti pulai ari menua luar duduk kediri sereta enda begulai enggau orang bukai maya ba bilun.

“Sida patut ngalau sekeda palan duduk ungkup orang tambang ke baru pulai ari luar nengeri enggau terus ngagai palan ke dituju sida empu,” ku iya nambah.

Ba jaku bukai, iya mega minta perintah mutarka isu rega tikit bilun mar enggau lengkas ungkup penerebai sekali pejalai ari Kuala Lumpur-Sibu enggau Sibu-Kuala Lumpur lebih agi kompeni penerebai domestik, enggau rega urung RM1,000 ungkup kelas ekonomi (ti ngaul transit).

“Aku ngasaika pekara tu udah dibantai ba parlimen ke alai rega tikit bilun udah niki ngenyit dibanding enggau ke dulu sebedau tu. Nyadi, aku ngasai penanggul nya patut diputarka,” ku iya.

Advertisement