KUCHING: Mensia mayuh ke diau ba Bagi Menua Kuching enggau Bagi Menua Samarahan diperansang ngambika enda mindah ngagai kandang menua ti dalam kategori Zon Gadung, kena nyeliahka COVID-19 ari berampit.
Sapit Kepala Menteri, Datuk Amar Douglas Uggah Embas madahka, pekara nya diputuska Komiti Mutarka Penusah Ngenyit Nengeri Sarawak berindik ari kes positif COVID-19 ba kededua bagi menua nya bisi nambah.
“Laban kes positif ba Bagi Menua Kuching enggau Samarahan majak nambah, pemindah entara Bagi Menua enda diperansang (tidak digalakkan).
“Pemindah orang mayuh entara bagi menua nya dikemendarka nyema bisi kes baka bejalaika pengawa rasmi, pekereja Perkhidmatan Penting (Essential Services), penusah pemati diri sebilik pemadu semak, diri sebilik sakit raya enggau enti bisi beperesa pengerai.
“Bepelasarka pemujur kitai ba renggat keterubah iya nya ketegal kerejasama ari semua raban bansa, nya alai kitai diatu ngelalau sereta meransang ngambika ke diau ba (Bagi Menua Kuching sereta Samarahan) ngambika enda ngelawa tauka nemuai ngagai kandang endur Zon Gadung,” ku iya lebuh nyebut entara pemutus ke digaga komiti nya.
Uggah ti mega Chairman komiti nya ba aum pengarang berita COVID-19 madahka sida udah ngemutus sereta nangguhka pengawa muka sesi sekula ba Pelilih Menua Padawan.
“Pengawa nangguhka muka sesi sekula dikerembaika ngagai Pelilih Padawan iya nya SJK Chung Hua, Siburan berengkah ari Primari 1, 2, 3, 4, 5 enggau 6. Ditangguh nyentuk 3 Ogos 2020.
“Lalu ngagai kelas Prasekula, sesi sekula sida diteruska,” ku iya.
Nambahka nya Uggah madahka komiti nya mega udah berandau enggau Universiti Malaysia Sarawak (UNIMAS) sereta ngaga pemutus sesi ngambi nembiak Program Pra Universiti deka ditangguhka nyentuk dipadahka baru ila.
Uggah mega madahka semua rayat Sarawak ke pulai ari menua luar, ke ngena penerebai sereta transit ba Semanjung Malaysia, Labuan, Sabah, Brunei tauka Singapura enda tau enda kuarantin 14 hari ba palan kepenudi endur sangkai.
“Berengkah 1 Ogos, sengkabung idung enggau mulut enda tau enda dikena maya ngelawa palan mensia mayuh, dalam perengka pengangkut mensia mayuh, palan bebeli barang, pasar, kedai makai enggau kedai runchit,” ku iya.
Sama bisi ba aum pengarang berita nya kemari Menteri Kaunsil Kandang Menua Dato Sri Dr Sim Kui Hian enggau Direktor Opis Pengerai Nengeri Sarawak Dr Chin Zin Hing.