BINTULU: Kaban Komiti Parti Pesaka Bumiputera Bersatu (PBB) enggau Parti Rayat Sarawak (PRS) N60 Kakus chakah mantu peranak ke mega sida ti tasah penusah angus ba Rumah Lanting Depong, Nanga Gun, Ulu Sungai Arip Selangau enggau nyumai sereta nyendiaka pemakai ungkup makai tengahari ba palan nya ensanus.
Ketuai Raban Indu PBB Kakus Rohana Abdullah madahka, pengawa nyendiaka pemakai nya diatur enggau chara pengawa beripai tumu pukul 6 pagi kena nulung enggau sinu ngagai sida ti udah tasah lenyau semua reta tengkira dalam penusah nya ti nyadi kena 18 Julai nyin tadi.
“Kami ngarap sida ti tasah ba penusah tu liat ati enggau penusah ti nuntung sida,” ku iya seraya nerang raban bukai bisi mega mantu dalam nyendiaka pemakai nya baka Ketuai Komuniti enggau Kaum (KMKK) Pelilih Tatau.
Kelimpah ari nya, Sekretari Sulit Kepala Menteri, Edwin Banta enggau PBB Pampang Kakus mega mantu ari sukut duit dikena meli perengka dapur nya lalu Edwin bisi meri mata duit sepenyampau RM1,000 ngagai peranak rumah panjai 18 pintu ke kena tasah penusah nya.
Bantu nya udah disua Kunsilor William Badi ngagai Tuai Rumah Lanting Depong.
Sama bisi datai dalam pengawa beripai nyumai ungkup makai tengahari iya nya Pemancha Gerosen Jubin, Penghulu Sanok Magai, Kaban Kunsil Pelilih Menua Pesisir Sibu (SRDC) ke mega Sekretari PBB Kakus Kunsilor Mathew Belawa Daud enggau Exco Indu PRS Kakus Esther Ansai.