MIRI: Atur sentang mesti ngena sengkabung idung enggau mulut berengkah ba bulan baru dikeirauka ulih meri empas ba bekal enggau rega barang nya ba dagang.
Menteri Muda Dagang Temuai, Seni enggau Main Asal Datuk Sebastian Ting madahka, empas nya deka balat diasai raban seranta sereta menua pesisir laban napi rega ti mar.
“Bisi ba sekeda palan, kelebih agi ba menua pesisir ti engka nadai akses ngulihka bekal sengkabung idung enggau mulut tu ke alai sida enda nemu sekalika bisi tauka enda bekal nya ba pasar. Nya alai, pengawa bebelika barang tu enggau berumban deka nyadi,” ku iya.
Atur mesti ngena sengkabung idung enggau mulut berengkah 1 Ogos ba palan mensia mayuh baka perengka pengangkut sereta palan mensia mayuh.
Menteri Kanan Pengelikun Menua, Datuk Seri Ismail Sabri madahka, pemutus nya digaga beratika ngagai tikas peniki kes ti berengkah mayuh baru kelimpah pengasi rayat ngagai SOP majak kurang.
Bejaku ngagai pengarang berita, Ting ke mega Kaban Kunsil Nengeri (ADUN) Piasau madahka, rega ungkup Kereban Pengelikun Diri (PPE) kala nyadi empas ari pengurang bekal nya ba dagang maya pandemik COVID-19 ti berengkah ngelekai ba menua tu kena pun taun nyin tadi.
“Tu entara pekara ti ngirauka ati. Aku minta perintah besai ngambika meda pekara (rega niki) tu. Maya diatu, nya (rega) enda tentu meri empas amat ngagai isi rumah.
Pengarap tu mega ditujuka ngagai perintah nengeri Sarawak dikena nyeliahka rayat lebih agi raban ti enda ulih nangkup belanja tambah ngulihka PPE.
Ting madahka, pengawa ngagihka PPE kelebih agi sengkabung idung enggau mulut diteruska ngambi semua isi rumah bisi bulih bekal ke chukup.
Nengah kerejasama semua dalam nyeliah enggau mutuska rentayan igi penyakit tu, rayat ulih munaska gelumbang kedua virus ti ulih nabanka nyawa tu.
Ting ke mega Chairman SUPP Piasau meri 3,905 sengkabung idung enggau mulut ngagai tujuh buah sekula ditu iya nya Kolej Tun Dato Hj Bujang, Sekula Primari (SK) Luak, Sekula Sekondari (SMK) Luak, SM Sains, SJK Tukau, SMK Agama enggau SJK Bakam.