MIRI: Rayat Sarawak dipinta ngambika terus beserakup dalam nentuka hak Sarawak terus dibasa lalu diasika perintah besai.
Menteri Perengka Pengangkut Sarawak Datuk Lee Kim Shin nyemetak madahka tetiap hak ti diambi tauka majak lenyau pengelama betaun ti udah patut dipulaika baru ngagai Sarawak.
Nitih ku iya, Kepala Menteri Datuk Patinggi Abang Johari Tun Openg benung chakah nentuka pekara tu ditegika lalu sebuah komiti khas ari baruh Kunsil Nengeri (DUN) udah digaga enggau batang tuju dikena ngulihka hak minyak enggau gis Sarawak ari baruh Ordinan Perlombongan Minyak.
“Nyadi siku rayat Sarawak, kitai enda tau mudah ngalahka diri ngagai semua penguji ti ditapi laban enggau penyerakup pupu bansa, politik ti manah sereta ketuai ti bisi diatu, kitai ulih ngalahka semua penguji ti ditapi nya.
“Penyerakup dalam pupu raban bansa enggau main asal tu iya nya chap antarabansa ungkup Sarawak. Kitai mesti beserakup ngemansangka Sarawak ti dikesayau kitai nyentukka nengeri tu ulih nyapai status mansang ba taun 2030 baka ti dikeinginka kepala menteri,” ku iya lebuh ti meri jaku pengelalu maya ngintu Pengerami Hari Sarawak 2020 ba Hotel Pullman Miri Waterfront ditu, malam kilah ensana.
Pengerami Hari Sarawak 2020 tu dirichahka agi enggau penatai Tuai Megai Menua (TYT) Tun Pehin Seri Abdul Taib Mahmud enggau bini Toh Puan Datuk Patinggi Raghad Kurdi Taib. Sama bisi mega Kepala Menteri Datuk Patinggi Abang Johari Tun Openg sereta bini Datuk Amar Juma’ani Tuanku Bujang enggau kaban kabinet nengeri.
Kelimpah ari nya, Lee nyemetak madahka sejarah Sarawak ti bekaul enggau pengawa numbuhka Malaysia patut dipasukka dalam bup teks sejarah sekula.
Ku iya madah, pengawa bansa nya endang patut dikena ngangkatka tikas penemu ke manah agi ba raban nembiak rebak baru bekaul hak Sarawak.
“Hari Sarawak tu ngarika asal ngagai rayat Sarawak. Endang beguna iya nya sejarah Sarawak ti bekaul enggau pengawa numbuhka Malaysia baka Sempekat Malaysia, Ripot Suruhanjaya Cobold, Ripot Komiti Entara Perintah, agih pekara ti berat dalam Konstitusyen Sarawak enggau Konstitusyen Malaysia sereta pekara sejarah ke bukai ti relevan patut dipasukka dalam bup teks sejarah sekula kitai.
“Tu deka ngangkatka tikas penemu ke manah agi, kelebih agi ngagai raban nembiak rebak baru kitai di nengeri tu nyentukka hak Sarawak nadai agi nyadi tanda tanya tauka enda patut dichabar,” ku iya.
Beserimbai enggau nya, bekaul Hari Sarawak, iya madahka hari nya pemadu besai reti ngagai rayat Sarawak laban kena 22 Julai, urung 57 taun ke udah, Sarawak udah diberi British peluang megai perintah kediri.
Ku Lee nambah, lebuh menira Union Jack diturunka, kabinet Sarawak ditumbuhka ti udah nyiri Tan Sri Datuk Amar Stephen Kalong Ningkan nyadi Kepala Menteri Sarawak keterubah lalu kaban kabinet mega penatai asal ari nengeri tu.
Nya alai, iya madahka pengerami ngintu Hari Sarawak tu endang beguna dikena ngingatka rayat bekaul pengeransing ketuai suba lalu ketegal nya mih ex Kepala Menteri Niang Pehin Sri Adenan Satem ba taun 2016 udah madahka 22 Julai tu diberi kemisi ba Sarawak ngambika semua rayat Sarawak ulih ngenang reti ngintu Hari Sarawak.
Bekaul enggau pengerami makai lemai, Lee ke mega menteri ti megai tanggungpengawa ngatur pengerami taun nya meri besai terima kasih ngagai perintah nengeri laban udah milih Miri nyadi pengatur pengerami ngintu Hari Sarawak taun tu ti berambai jaku ‘Sarawak Cemerlang’.
Iya madah, tu keterubah nya perintah nengeri ngatur pengerami nengah ‘norma’ baru berindik ari pandemik COVID-19.
“Sekali tu, konsep ngaintu pengerami endang nya bida enggau taun sebedau tu laban kitai mesti ngasika Prosedur Operasyen Standard (SOP) maya pandemik COVID-19.
“Program malam tu (malam ensana), nyadika banding, ke alai penyampau pesereta ti sama enggau ngintu ditaka lalu sida mega mesti ngena sengkabung idung enggau mulut,” ku iya.
Berindik ari gaya ti enda tentu manah, pengerami tu diintu enggau chara tradisional, program berengkah pukul 9 malam, dipancharka terus ari Miri nengah mayuh macham platform media baka TV3, Youtube Unit Komunikasyen Perintah Sarawak (UKAS), Astro Awani, Sarawak Event Channel sereta TV Sarawak.
Mayuh macham program digital udah diatur ari raban Unit Protokol enggau Pengatur Program Nengeri (UPPAN) baka betanda ngemunka pengerami, simbolik ngemunka program, dokumentari khas, ‘sitkom’ Kampong Pelepar Putus, medley belagu sereta segmen ‘Aspirasi Rakyat’.