PAKAN: Pasar Pakan deka dikemansang nyadi sebengkah palan pasar besai ti teatur di menua pesisir dalam Atur Pemansang Malaysia Lumpar Ke-12 (RMK12).
Kepala Menteri Datuk Patinggi Abang Johari Tun Openg madah, pemansang ke deka digaga ba endur nya mungkur penyauh 10 kilometer ari puak pasar.
“Dalam RMK12 tu, kami udah minta Opis Tanah enggau Survei (JTS) Sarawak ngaga pelin besai kena ngemansangka kandang pasar Pakan ti beratka pemansang ke teatur.
“Pemansang ti deka di gaga ditu nyengkaum disikap enggau infrastruktur baka genturung rumah, palan rekreasyen, taman mensia mayuh, rumah kedai palan nyual produk betanam betupi enggau mayuh agi perengkaguna ke bukai.
“Pengawa tu beguna amat laban bepelasarka pansik ba kandang menua tu, kami meda Pakan tu ulih ngerembai nyadi palan agropolitan ke beguna amat ba kandang tengah Sarawak,” ku iya.
Iya bejaku munyi nya lebuh bejadi Pengerami Muka Jalai Pakan/Ulu Kota Pakan (Fasa 2) ditu, kemari.
Projek Jalai Pakan/Ulu Kota Pakan (Fasa 2) tu betikas R3 Standard sepenyauh 15.4 kilometer ke udah tembu enda digaga kena 3 Disember 2019, lalu udah dibuka ngagai mensia mayuh.
Entara skop bukai projek tu nyengkaum jalai nuju ke Sekolah Kebangsaan (SK) Sembawang enggau SK Nanga Dayu nyengkaum empat jematan konkrit iya nya di Sungai Seguk, Sungai Litok, Sungai Dayu enggau Sungai Kara.
Ba pengerami nya mega, Abang Johari madahka projek pengawa ngaga Fasa 3 Jalai Pakan/Ulu Kota Pakan-Sadok/Betong/Pan Borneo deka dipejalaika.
Ku iya, jalai nya beguna amat kena ngemujurka aktiviti pemansang di menua nya kelebih agi dalam sektor betanam betupi.
“Nengah gaya geografi ke engkeman, penyubur tanah enggau aktiviti pemun ngemansutka produk peranak ba kandang menua tu dalam bidang betupi, kami pechaya pengawa nempa nyadi penyanding pelilih menuake pemadu beguna ngagai bagi menua Sarikei nyadi ‘Food Basket of Sarawak’ ulih dikemujurka enggau manah.
“Perintah Sarawak deka majak meri sukung ba pengawa nyapai juluk nya lalu kami meramb u nambahka agi ungkup belanja ungkup sektor betanam betupi maya bejuraika bajet, ti deka datai,” ku iya.
Ku Abang Johari, pengawa ngaga projek tu udah muka akses ngagai mayuhagi peluang sosioekonomi peranak di menua tu kelebih agi dalam aktitviti betupi enggau industri bumai bekebun ke nyadi batang penatai pemisi sida.
“Nengah pemisi akses peyambung jalai darat di menua tu, raban orang bumai enggau pekebun mit ulih nambahka asil sida bejual ti ngujungka sida tasu ngasaikatikas pengidup ke manah agi.
“Kelimpah ari nya, pengawa ngemansangka infrastruktur tu deka nyaup muka mayuh agi kandang menua ti meransang aktiviti dagang enggau pengerembai sektor-sektor bukai ba kandang endur ngelingi tu,” ku Abang Johari.
Berebak enggau nya, Menteri Muda Infrastruktur enggau Pemansang Penyangkai Kapal Sarawak Datuk Julaihi Narawi ti ngarika Sapit Kepala Menteri ke mega Menteri Infrastruktur enggau Pemansang Penyangkai Kapal, Tan Sri James Datuk Amar Dr James Jemut Masing ba pengerami nya madah, projek Jalai Pakan/Ulu Kota Pakan (Fasa 2) beungkus RM122.5 juta.
“Ungkup projek ngaga renggat keterubah ke sepenyauh 13.3 kilometer, nya beungkus RM63.7 juta.
“Projek ngaga jalai tu udah meri empas positif ngagai 22 rumah panjai ke ngembu an penyampau tubuh 2,034 iku, nyengkaum beberapa buah sekula.
“Nyema projek fasa ketiga dipejalaika ila, bisi 10 rumah panjai ke ngembuan penyampau tubuh 930 iku deka bulih pemaik ari samb ung jalai ke manah,” ku Julaihi.
Ku Julaihi, pengawa tu m andangka perintah Sarawak amat komited nyingkang mansang begulai enggau rayat enda ngira dini endur sida.
Sama bisi ngulu pengerami nya, Kaban Kunsil Nengeri Pakan Tan Sri William Mawan Ikom, ADUN Meluan Rolland Duat Jubin, ADUN Repok Dato Sri Huang Tiong Sii, pengari Sekretari Peintah Nengeri Sarawak, Datuk Mohamad Abu Bakar Marzuki enggau Residen Bagi Menua Sarikei Felicia Tan Ya Hua.