KUCHING: Bajet 2021 patut mekuh ngagai pengawa ngangkatka tikas pengidup rayat pengudah nerima empas negatif ti besai ketegal pandemik COVID-19.
Pesuruhjaya Suruhanjaya Hak Asasi Manusia Malaysia (SUHAKAM) Sarawak, Dr. Madeline Berma madahka Bajet 2021 patut ulih ngurangka tikas penyampau orang ti nadai pengawa kena nentuka pekereja di menua tu bulih baru pengawa sida nengah bemacham inisiatif.
Iya pechaya tikas pemayuh orang ti nadai gawa di menua tu niki ngagai lima peratus (778,800) iku ba pun bulan April ketegal pentin Atur Nagang Pemindah (PKP) kenyau 18 Mac nyin tadi ulih dikurangka nyema perintah terus mantaika inisiatif subsidi upah, meri latih baru sereta nambahka pengelandik ke endang bisi dikembuan pekereja menua tu diatu.
Bajet 2021 mega, ku iya, patut mekuh ngagai pengawa ngelakuka pengidup ti meruan enggau ngenegapk sereta ngempung prinsip Rampa Menua, Rama sereta Pengawa Ngatur dalam operasyen ekonomi enggau mega dagang.
Tu pekara ti berat, ku iya, dikena nentuka kompeni tauka organisasyen dagang ngetanka pekereja, klien enggau komuniti.
“Rayat randaka pekara ti manah agi dalam Bajet 2021 pengudah menua enggau dunya betapi enggau empas negatif pandemik COVID-19.
“Tu ditegapka agi enggau tema Bajet 2021 ti deka dipadahka bulan November tu iya nya nyaga pengelantang pendiau rayat,” ku iya madah ngagai Utusan Borneo kemari.
Madeline ke mega Pemansik Ekonomi sereta Felo Akademi Sains Malaysia madahka rayat udah tentu dekaka sektor servis perintah ditegapka dalam Bajet 2021.
Rayat enggau sektor ekonomi, ku iya, dekaka tetiap bantu sereta inisiatif ti dipadahka perintah nya datai ngagai raban ke patut nerima nengah pengawa ngumpul belanja ti diagihka enggau silik.
“Bajet 2021 mega patut nyendiaka agih belanja ke besai dikena nyakahka baru aktiviti ekonomi sereta narit pengandal klien enggau orang beranakka puku,” ku iya.
Malaysia ngerikodka penambah ekonomi ba tikas 0.7 peratus ba suku keterubah taun tu, ti pemadu baruh ba timpuh 10 taun kenyau ari taun 2001, menua semina ngerikodka penambah 1.2 peratus ba suku ketiga.
Pia mega ari sukut belanja, peminta enggau pemeranak puku luar nengeri bisi kurang tang ari sukut peribit bisi jelan nambah.
Penambah ti tengan pemesai tu iya nya ari pemutus ba renggat global enggau dalam nengeri dikena nangang pengelekai pandemik COVID-19, ku iya nambah.
“Beserimbai enggau nya, perintah patut ngiga jalai dikena ngenyakahka agi sektor peribit.
“Kelimpah ari nya, meransang sereta nyukung aktiviti e-dagang enggau ekonomi gig, segmen ekonomi ti majak tebilang kemaya hari tu kelebih agi ba raban nembiak.
“Ekonomi gig iya nya dagang servis pekereja kontrak timpuh pandak tauka sebarang kereja ke digaga individu ti ngena teknologi digital,” ku iya.
Pengawa bejalaika ekonomi gig tu nyangka deka terus ngerembai seriris enggau penyampau orang ti nadai gawa ti diperambu deka terus nambah.
Menteri Pekara Wang Tengku Datuk Seri Zafrul Tengku Abdul Aziz bedau lama ti udah, madahka Bajet 2021 diperambu bepelasarka empat tema besai iya nya nyaga pengelantang pendiau rayat, nyungkak ekonomi, pengidup ti meruan sereta ngenegapka servis perintah.
Nitih ku iya, semua tema nya mai tuju nyapai pengandal perintah ti deka nyadi raban pengatur menua ti teguh.