SIBU: Kaban Parlimen Sibu, Oscar Ling madahka diri nyukung jaku lalau bekaul enggau semua orang patut ngena sengkabung idung enggau mulut lebuh ba palan mensia mayuh laban pandemik COVID-19 apin datai ba ujung.
Dalam timpuh ke diatu ku Ling, sekeda ari atur Prosedur Operasyen Standard (SOP) iya nya ngena sengkabung idung enggau mulut lebuh mindah ke sebarang alai.
“Dalam ‘norma’ ke baru tu, mayuh orang ngasaika diri enda likun enti besepiak enggau orang ke enda ngena sengkabung idung enggau mulut.
“Berindik ari penyampau kes COVID-19 ti majak niki bedau lama ke udah, mensia mayuh majak nangika empas gelumbang kedua nuntung menua kitai,” ku iya lebuh meri timbal bekaul enggau penerang ti dibantaika Ketuai Direktor Pengerai Datuk Dr Noor Hisham Abdullah empai lama.
Kena Hari Enam minggu nyin tadi, Dr Noor ngelalau semua orang ke bisi ngelawa palan mensia mayuh tauka tetutup, patut ngena sengkabung idung enggau mulut.
Ku iya, endang amat pekara tu apin bisi ukum dalam undang-undang, tang enti perintah menua mutuska deka bejalaika atur nya, orang ke ngelaban atur tu deka napi ukum mata duit RM1,000 tauka jil ari kort.
Ku Dr Noor nambah, perintah menua ulih bejalaika atur nya ari baruh Akta Ngemunas sereta Nagang Penyakit Berampit 1988 (Akta 342).
Berebak enggau nya Ling madah, dikena kitai nagang diri napi empas pandemik COVID-19 gelumbang kedua, tetiap iku kitai patut bejalaika tanggungpengawa diri empu, nentuka atur SOP dikemata enggau terit sereta ngena sengkabung idung enggau mulut lebuh mindah kin kia.
“Aku enda nemu madah berapa pemesai reti sereta ke guna ngena sengkabung idung enggau mulut dalam timpuh ke diatu. Minta tulung kita nyaga pengelikun diri enggau orang ke bukai.
“Kelimpah ari nya, kena mih sengkabung idung enggau mulut enggau chara ke betul. Sekeda ari mensia mayuh enda ngemeratka pekara tu.
“Aku suah tepedaka orang ngena sengkabung tu tang enda nangkup idung. Bisi mega ngena sengkabung idung enggau mulut ti udah lama,” ku iya.