KUCHING: Sapit Kepala Menteri Datuk Amar Douglas Uggah bedau lama udah nyuaka geran ngagai enam buah sekula primari sereta sebuah sekula sekondari kena nyikap diri ungkup sesi ketiga besekula.
Ku iya, geran nya kena mantu sekula nya meli mayuh agi termometer sereta nyendiaka palan endur nuchi jari ke engkeman maya pandemik COVID-19 diatu.
“Sekula Sekondari Spaoh (SMK Spaoh) udah nerima RM15,000.
“Nangkanka nya, Sekula Primari (SK) Spaoh, RM10,000, Sekolah Jenis Kebangsaan Cina (SJKC) Chung Hua, RM7,000, SK Suri Debak (RM15,000) SK Nanga Gayau (RM5,000), SK Paku Sentral (RM8,000) enggau SK Nanga Tiga (RM15,000),” ku iya nambah nengah penerang berita kemari.
Iya mega nyemetak madahka sekula mesti ngemeranka atur Prosedur Operasyen Standard (SOP) kena nyendiaka gaya ti likun ngagai semua raban ba sekula.
Nengah renggat ketiga muka baru sekula ti deka berengkah kena 22 Julai tu ti mungkur nembiak sekula Primari 1 nyentuk Primari 4.