Anda di sini

PM irau enggaika ‘lockdown’ dipejalaika baru

Advertisement
 Muhyiddin meri ‘Jaku Pesan Khas’ ke pemadu baru bekaul enggau Atur Nagang Pemindah Mulaika Pemanah (PKPP) ba begunan Parlimen di Kuala Lumpur, kemari. — Gambar Bernama
MERI PENERANG: Muhyiddin meri ‘Jaku Pesan Khas’ ke pemadu baru bekaul enggau Atur Nagang Pemindah Mulaika Pemanah (PKPP) ba begunan Parlimen di Kuala Lumpur, kemari. — Gambar Bernama

KUALA LUMPUR: Irauka kes positif COVID-19 ke nyadi baru tau manggai ba lumur dua ‘digit’ di menua tu diatu, Tan Sri Muhyiddin Yassin ngasaika pemar ke ditapi rayat enggau menua nyema ‘lockdown’ (atur nagang pemindah) dipejalaika baru berindik ari penambah ngenyit kes nya.

Menteri madah, rayat anang enda ibuhka pekara ke nyadi enggau pemisi 13 kluster baru sekumbang timpuh Atur Nagang Pemindah Mulaika Pemanah (PKPP) lebuh sida ngasaika pengidup ti nyauka pulai manah baru maya ke diatu.

“Aku nemu kita tentu enggaika perintah neritka ‘lockdown’ baru nyema kes COVID-19 nambah enggau ngenyit. Aku mega besampi ngambika kitai enda datai ba renggat nya,” ku iya lebuh meri jaku pesan khas bekaul enggau gaya PKPP ti dipancharka nengah televisyen menua tu.

“Chukup mih tiga bulan kitai semua bekurung di rumah ngambi mutuska rentayan pengelekai COVID-19. Ekonomi menua kitai balat labuh, dagang rugi lalu mayuh orang nadai kereja agi. Tentu kitai enggai idup baka ba maya ‘lockdown’ nya,” ku iya.

Ku Muhyiddin, nyema perintah neritka baru ‘lockdown’, nya deka meri empas ke amat besai kelebih agi ngagai ekonomi lalu menua deka rugi urung RM2 billion sehari, lalu tu ngujungka kitai lenyau jalai penatai pemisi ungkup bejuta pekereja di Malaysia.

Nya deka ngenimpangka pengawa perintah, sektor peribit enggau gerempung ukai dikuasa perintah (NGO) ari baruh Pakej PRIHATIN enggau PENJANA ke ngembuan juluk deka mulaika baru pemanah ekonomi.

“Patut ingat mega perintah udah mantaika pakej ngerembaika ekonomi ‘Pakej Rangsangan Ekonomi Prihatin Rakyat’ (PRIHATIN), PRIHATIN Tambah enggau Pelin Ngangkatka Baru Ekonomi Menua PENJANA ke alai semua nya sepenyampau RM295 bilion ke pengelantang rayat enggau ngangkatka dagang dalam timpuh ke tusah tu,” ku iya. — Bernama

Advertisement