SIBU: Parti Sa’Ati Rakyat Sarawak (SUPP) Pampang Bawang Assan udah nganjung nama chalun ngagai presiden parti sida ungkup kerusi Kunsil Nengeri (DUN) Bawang Assan, ba Pengawa Bepilih Nengeri Ke-12 (PRN12) ti deka datai.
Chairman SUPP ke mega Kaban Dewan Negara Senator Robert Lau madah, SUPP ngembuan chalun ke patut sereta endang udah ngembuan peneleba dalam pengawa meri servis ke rayat.
“Kami udah nganjung nama chalun nya ngagai Presiden SUPP Dato Sri Dr Sim Kui Hian, ngambi diperundingka raban parti tu enggau Gabungan Parti Sarawak (GPS).
“Aku enda ulih madahka sapa bagi chalun tu, lalu kami nyerahka raban ketuai nentuka pemutus nya ila,” ku Lau lebuh dikerandau pengarang berita lebuh ke ngabas rumah panjai ba kandang Bawang Assan enggau Tanjung Bekakap, lemai ensana.
Berebak enggau tu ku Lau, SUPP udah ngintu rayat ba kandang Bawang Assan enggau chara konsisten sereta nitihka pematut, lalu ukai semina mantaika diri lebuh timpuh pengawa bepilih nyau semak.
Ba pengawa nya mega, iya bisi ngelawa sekeda projek ti dipejalaika Opis Pelilih Menua Pesisir Sibu (SRDC) ba Bawang Assan.
Nitihku Lau, entara projek ti udah tembu iya nya pengawa melakin jalai alun ba Jalai SK Bawang Assan, ti beungkus RM435,000.
“Projek ke bukai ti udah tembu digaga iya nya projek ngaga palan ngengkahka entukar ba Rumah Saing, Tanjung Bekakap, Sungai Lebaan,” ku iya nambah.