KUCHING: Kepala Menteri Datuk Patinggi Abang Johari Tun Openg madahka polisi pemansang ekonomi Sarawak mesti disimpul sereta diubah baru kena mutarka isu penatai pemisi ruang bilik ke baruh ba ikas RM5,218 ungkup taun 2019.
Ku iya, pengawa nya muka jalai beratika asil ekonomi nengeri tu dipeda enggau lurus agi ngagai rayat Sarawak.
“Pemansut Kasar Dalam Nengeri (KDNK) Sarawak taun siti nyin tadi (2019) iya nya RM136.05 bilion, penyampau ti mayuh ketegal asil ari industri minyak enggau gis.
“Taja pia, nya nadai dipeda ba penambah penatai pemisi rayat ke amat,” ku iya lebuh bejadi pengerami Ngitung Penyampau Tubuh Paranak Nengeri enggau Pengawa Berumah Malaysia 2010 (MyCensus 2020) ungkup Sarawak di Wisma Bapa Malaysia ditu, kemari.
Dulu ari nya, iya diberi Sapit Direktor Opis Pengintung Penyampau Tubuh, Dayang Rozana Abang Hassan penerang sentang pengawa bejalaika MyCensus 2020.
Sama bisi datai, Sekretari Perintah Nengeri Datuk Amar Jaul Samion enggau Sapit Sekretari Nengeri Sarawak ke mega Sapit Komisioner Ngitung Tubuh Sarawak, Datu Ik Pahin Joyik.
Ku Abang Johari, bedau lama udah perintah besai madahka penyampau Penatai Pemisi Garis Penyeranta (PGK) ari RM980 nyentuk RM2,208 ti udah tentu deka nambahka penyampau rayat ke ari baruh penyampau penyeranta.
Nya alai ku iya, pengawa ngitung tubuh menua ti benung dipejalaika diatu, beguna amat ngagai pemansang menua kelebih agi Sarawak.
Sentang ikas pukul rata penatai pemisi ruang bilik ke mit di Sarawak, Abang Johari madahka penyampau penatai pemisi per kapita ke tinggi ungkup nengeri tu, nadai mandangka pekara ke amat ba pengawa ngagihka pengaya ngagai rayat.
“Asil Pengawa Ngitung Tubuh enggau Pengawa Berumah Malaysia 2020 deka mantu Sarawak nyimpulka mayuh bengkah chara ekonomi ti digaga kena nambahka penatai pemisi rayat,” ku iya.
Ku iya, ketegal nya mih penerang asil ari pengawa ngitung tubuh nya beguna amat ngagai Sarawak.
Berebak enggau nya, iya minta rayat nengeri tu meri kerejasama ngagai Opis Ngitung Tubuh Malaysia, kena nentuka pemujur pengawa ngitung tubuh ke sekali tu.
Pengawa Ngitung Tubuh enggau Pengawa Berumah Malaysia sepuluh taun sekali nya, udah lima kali dipejalaika berengkah ari taun 1970, lalu penudi enda dipejalaika ba taun 2010.
Pengawa Ngitung Tubuh enggau Pengawa Berumah Malaysia taun tu berengkah ari 7 Julai 2020 ti ngena ‘Sistem Banci Penduduk Bersepadu Malaysia’ (MyIPCS) kena ngemodenka MyCensus 2020.
MyIPCS sebengkah sistem ngitung tubuh ke komprehensif nengah pengawa nambahka pemanah e-Census ti mantaika langkar kereja begempung ti mungkur proses ngumpul penerang ke mar diulih, analisis enggau pengawa ngagih.
MyCensus 2020 negmbuan beberapa tanya tambah sentang penyilik pengawa berumah, pengerai, gaya idup enggau kaul sosial, kena mandangka gaya pengidup mensia mayuh.