BINTULU: Sapit Kepala Menteri, Datuk Amar Douglas Uggah Embas, madahka konsep stesyen betanam betupi di nengeri deka diserenih baru.
Ku iya, nya kena nentuka stesyen betanam betupi di serata nengeri mengkang relevan setipak enggau juluk perintah nengeri deka ngemodenka sektor nya.
Iya madah munyi nya lebuh nemuai seraya kereja ngagai Palan Latih Betanam Betupi Sg. Sebiew ditu, kena Hari Minggu.
Lebuh ke nemuai nya, Menteri Utiliti Datuk Seri Dr Stephen Rundi Utom ke mega Kaban Kunsil Nengeri Kemena, Menteri Muda Undang-Undang enggau Adat Bumiputera Datuk John Sikei Tayai (ADUN Kakus), ADUN Samalaju, Majang Ringgie enggau ADUN Murum Kennedy Chukpai diberi penerang sentang mayuh bengkah projek betanam betupi ti dipejalaika ari baruh Wang Turu Ngemudahka Chara Betanam Betupi (AFF) ba sitak sida empu.
Uggah ke mega Menteri Betanam Betupi Moden, Tanah Adat enggau Pemansang Kandang Menua madah,diatu stesyen betanam betupi mesti bisi bungkur tanah ke lebih besai, iya nya abis nadai 40 hektar.
“Kami dekaka stesyen betanam betupi tu bisi tanah ke besai endur madangka chara betanam betupi moden.
“Diatu, stesyen tu ngembuan bungkur tanah ke mit alai bejalaika pengawa nya enggau ngasi,” ku iya.
Berebak enggau nya, Uggah madahka opis menteri iya merambu nambahka kapasiti pengelandik dalam mayuh bengkah bidang baka ba pengawa nanam enggau ngintu pun rian.
Ku iya, opis menteri iya mega deka beratika baru tampung program betanam betupi nya.
“Ba aku program tu agi engkeman amat...meri penemu enggau servis lalau nyengkaum nyendiaka latih ngagai orang kitai ke betanam betupi. Program ke baka tu bisi tinggal mimit diatu.
“Ba menua ti ngemeranka pengawa betanam betupi moden baka Taiwan enggau Thailand, sida (stesyen betanam betupi) mengkang beguna amat,” ku iya.
Ku Uggah, sebedau tu fokus diberi ngagai orang ke betanam betupi ngemansutka produk ke guna sida empu aja, tang diatu fokus diberi ngagai pengawa betanam betupi komersial moden.
“Kami deka ngeregaska pekebun mit. Kami deka nanam tauka nupi mayuh agi ngambika kitai ulih ngeksport, ukai semina nyadi pengimport belama.
“Kami nemu tu mar lalu aku begunaka semua bantu enggau timbal ari semua pengari rayat,” ku iya.
Ku Uggah, enti orang ke bekebun betupi ditu ulih ngasilka asil ba penyampau ke mayuh ngambika ulih dijual, nya udah tentu meri penatai pemisi ke manah agi.
Sentang projek AFF, iya madahka pengawa bejalaika nya bisi penanggul mimit berindik ari pengawa neritka pentin Atur Nagang Pemindah (PKP) kenyau ari 18 Mac 2020 kena nagang pengelekai pandemik COVID-19.
“Kitai mesti jampat lalu aku ngarapka projek tu ulih dipejalaika ujung bulan tu,” ku iya.