JULAU: Perintah Sarawak baruh pegai Gabungan Parti Sarawak (GPS) ti ngena slogan ‘Sarawak First’ lebuh bejalai gawa ke rayat kena nampung legasi ex-Kepala Menteri ke sebedau tu, iya nya niang Pehin Sri Adenan Satem.
Nengah Gabungan Parti Sarawak (GPS) ti udah dalam timpuh dua taun, pengari rayat enggau ketuai renggat baruh parti tu udah chakah bejalaika servis ngagai rayat, ku Kaban Kunsil Nengeri (ADUN) Meluan Rolland Duat maya pengawa “Ketuai Begulai Enggau Rayat” ba Rumah Eddy Jemat, Nanga Sematu, Merurun ditu kena Hari Enam empai lama.
Sida engka udah ngubah parti sida ari Barisan Nasional (BN) ngagai Gabungan Parti Sarawak (GPS), tang sida tetap bepegai rat ba semaya tauka manifesto pengawa bepilih sida, nya alai, rayat ulih meda mayuh projek pemansang dipejalaika sekumbang empat taun ke udah tu.
“Kebendar, perintah GPS baruh pegai Kepala Menteri Datuk Patinggi Abang Johari Tun Openg mega udah nampung bejalaika sekeda projek baka jematan enggau ngangkatmanah sekula repuk ti udah dikinsil tauka dikelaung perintah besai ke sebedau tu dipegai Pakatan Harapan,” ku iya nambah.
“Berebak enggau nya, aku gaga ati semanjai empat taun udah nyadi Kaban Kunsil Nengeri (ADUN) Meluan, aku udah mayuh mantu meri projek pemansang ti beungkus bejuta ringgit ngagai konstitusyen ditu,” ku iya.
Entara projek tu iya nya jalai alun, jematan, bekal ai nengah sistem graviti, bekal elekterik nyengkaum bekal kuasa solar, mantu ngangkatmanah enggau ngaga rumah panjai, numbuhka Biro Indu kena ngemudahka penyereta orang indu dalam aktiviti ekonomi enggau ke bukai, ku iya.
Rolland mega madahka senentang projek ti dipejalaika nengah agih belanja Projek Mit Menua Pesisir (MRP) enggau Projek Tranformasyen Menua Pesisir (RTP) sereta bantu khas dikena mantu ngemanahka rumah orang seranta.
“Sentang ke bukai, GPS bejalaika pengawa politik ti mekuh ngagai deka mutar enggau chara dikena ngangkatka tikas pengidup rayat ti endang bebida enggau parti politik ke bukai ke semina landik bejaku bula enggau rayat kena ngelabuhka parti ke dilaban ketegal ke penguntung sida empu,” ku iya.
Rolland minta mensia mayuh terus meri sukung ti rat ngagai GPS ti udah ngayanka pemujur ke manah dalam ngatur pemansut nengeri enggau kuing runding ti jauh dalam pengawa program pemansang dikena nentuka pengidup semua rayat di Sarawak manah agi jemah ila.
Rayat patut nemu enda agi bejudika pengidup sida jemah ila enggau pengarap ke bula diberi pengari politik ti ngerundingka diri empu ke suah dipeda maya pengawa bepilih ti deka datai, ku iya.
Sekretari Politik Kepala Menteri, Brian Fung Kok Shiun ti bejaku ba pengawa nya ngelalau rayat bejejaga enggau kaban politik ti ‘bemusim’ ti suah dipeda maya pengawa bepilih.
Iya mandingka kaban politik bemusin tu sempama baka kulat tumbuh pengudah ujan.
Baka ti suah diperati, kaban politik bemusin tu ngena mayuh macham strategi tauka chara dikena sida ngelakuka diri enggau platform politik, ku Brian seraya nambah, suah agi ari ke enda sida berani ngemula enggau meri semaya ngapa ti dikena nipu rayat.
Entara ke bukai ti mega bejaku ba pengerami iya nya ketuai Parti Demokratik Progresif (PDP) kandang menua nya Andrew Janting, Penghulu Blawan Grinang, kunsilor Jeffery enggau tuai rumah panjai ari kandang menua ke semak enggau nya.
Lebuh ba pengerami nya, Rolland diberi basa enggau rasmi bejadika Biro Indu rumah panjai.