SIBU: Opis Menteri Dagang Dalam Nengeri enggau Pekara Penguna (KPDNHEP) Pampang Sibu majak chakah bejalaika pengawa meresa sereta matau ninting hari, nengah tim ti mungkur pemesai penerit adat enggau pemesai pematau rega (PPH), kemari.
Nengah penerang ti dibantaika ba laman ‘Facebook’ rasmi KPDNHEP Sibu, pengawa meresa tu ngemeratka pengasi raban dagang nitihka atur Prosedur Operasyen Standard (SOP) Atur Nagang Pemindah Mulaika Pemanah (PKPP), bekal barang ke guna mensia mayuh, sengkabung idung enggau mulut sereta sanitasyen jari.
Kelimpah ari nya, raban ti bejalaika pengawa meresa sereta matau tu mega bisi ngelalau raban dagang, ngambi nitihka rega barang ti udah ditetapka enggau ngelekatka tanda rega ba barang ke dijual.
Sama bisi diperesa iya nya kereban dikena nyukat sereta penimbang, mansik ripot penguna sereta matau rega barang ba palan dagang burung enggau runchit ba kandang menua Sibu enggau Sibujaya.
Nangkanka tu, Bilik Operasyen KPDNHEP Sibu seruran beoperasyen ari pukul 8 pagi nyentuk pukul 6 lemai, ninting hari semanjai timpuh PKPP.
Berebak enggau nya, mensia mayuh ti bisi sebarang berita, ripot tauka pekara ke deka ditanya, tau dianjung terus ngagai aduan.kpdnhep.gov.my tauka betelefon ngagai Bilik Operasyen KPDNHEP Sibu ba lumur 084-335662 tauka WhatsApp ngagai 019-2794317 (Ripot Penguna).
Penguna mega ulih meresa enggau mandingka tikas rega sebedau bebelika barang, ba website ‘Price Catcher’.