SIBU: Sekula Sekondari (SMK) Agama Sibu deka nentuka urung 610 iku nembiak sekula ari Form 1 nyentuk Form 6 seruran nitihka atur Prosedur Operasyen Standard (SOP), seriris dalam pengawa dikena ngemunaska pandemik COVID-19.
Berindik ari tu, Kepala Pengajar SMK Agama Sibu Hosmawati Bairi madahka, ninting pagi sida deka meresa tikas pengangat tubuh tetiap iku nembiak sekula ari Form 5 enggau 6 Atas, sebedau nembiak tama ke dalam kelas.
“Ungkup ke diatu, urung 118 iku nembiak Form 5 enggau 6 Atas ti bisi datai belajar dalam kelas sida.
“Tetiap mija nembiak sekula udah ditusun bepelasarka atur SOP enggau seraka sosial satu meter,” ku iya.
Ku Hosmawati nambah, sida mega nentuka nembiak sekula nya ngena sengkabung idung enggau mulut, sereta nyendiaka perengka dikena nuchi jari ba semua kelas.
“Baka ti udah ditemu kitai, ngena sengkabung idung enggau mulut endang sekeda ari atur dalam SOP.
“Ungkup nembiak kami ti diau ba buding sekula, palan peninduk sida mega diatur nitihka SOP enggau seraka sosial satu meter. Kami bisi nyendiaka sekeda palan enggau sabun alai nembiak nuchi jari,” ku iya nambah.
Kelimpah ari nya, ku iya, SMK Agama Sibu bisi 310 ari 610 iku nembiak sida diau ba buding sekula, lalu nembiak Form 4 enggau 6 deka pulai besekula baru kena 15 Julai tu ila.
Nembiak ke bukai diau ba mengeri Sibu, lalu sida ke diau ba buding sekula tu iya nya ari Matu/Daro, Mukah, Belawai, Semop, Bruit enggau Sarikei.
“Ungkup nembiak Form 1 nyentuk Form 3, kelas sida deka ditampung baru kena 3 Ogos ila,” ku iya.
Nambahka nya, Hosmawati madahka bala apai indai enda ibuh irauka pengelikun bala anak sida laban raban sekula endang ngemeratka atur SOP enggau terit dikena ngemunaska pandemik COVID-19.