SARIKEI: Raban pekereja rintai mua di Pelilih Menua Pakan udah diintu ba siti pengerami kena meri terima kasih ngagai raban nya ti bebendar gawa maya Atur Nagang Pemindah (PKP) COVID-19.
Kaban Kunsil Nengeri (ADUN) Pakan Tan Sri William Mawan Ikom madahka perintah beterima kasih ngagai semua pekereja rintai mua lebih agi ngagai Residen ke nyadi Chairman Komiti Mutarka Penusah Ngenyit Bagi Menua enggau Pemesai Pelilih Menua Pakan ti sama bebendar besaup mutus tauka munaska COVID-19.
Entara ejensi ti bekaul tauka nyadi raban ti ba baris mua ke bisi ngulu pengerami nya nyengkaum sida ari Opis Residen, Opis Pelilih Menua Pakan, PDRM, Bomba, RELA, Opis Pengintu Pengelantang Pendiau, Klinik Pengerai Pakan, Majlis Daerah Meradong/Julau enggau APM.
“Aku ngarika perintah deka meri terima kasih enggau basa ngagai semua pekereja rintai mua, sereta malam tu ungkup pekereja rintai mua ba Pakan.
“Kitai, raban bansa di Pakan mega meri terima kasih ngagai pekereja rintai mua ba pemendar sida ti udah ngelaban tauka deka munaska igi penyakit COVID-19 sereta nyadika Pakan nyadi Zon Gadung,” ku iya lebuh bejaku seraya bejadi pengerami nya.
Ku iya, maya pekereja rintai mua dikangau gawa enda ngira maya, sida nya nadai berunding lama sereta ninggalka ruang bilik enggau orang ke dikesayau.
Berebak enggau tu Mawan minta raban pekereja rintai mua ngenataika peminta bantu nengah kelab lumba enggau main tauka rama awakka Palan Servis iya ulih ngungkupka belanja kena bejalaika aktiviti sida ti nyadi kelai meri basa ba pemendar sida gawa ngelaban COVID-19.
Mawan mega ngarapka pandemik COVID-19 ulih punas enggau lengkas ke pengerai semua.