MIRI: Penanggul tikas pengasi dokumentasyen enggau saru penemu pengawa nyiri ejen nganjung barang kandang menua ke berejista enggau Palan Penyangkai Kastam iya nya nyadi kebuah 458 kontena mengkang enda dipansutka ba Palan Penyangkai Kapal Miri.
Menteri Perengka Pengangkut Sarawak, Datuk Lee Kim Shin madahka, semua kontena nya nganti bulih pemendar ari Opis Kastam DiRaja Malaysia Miri.
“Tu ti ngujungka penyekut ba palan penyangkai, barang ke udah ditetapka napi pengerusak kelimpah ngelubahka timpuh gintir kapal ba Palan Penyangkai Kapal Miri berindik ari kontena ti kelalu mayuh.
“Berebak enggau nya, aku ngarapka semua nyengkaum kastam, palan penyangkai enggau ejen nganjung barang bekerejasama mutarka penanggul penyekut kontena tu,” ku iya maya nyadi chairman aum begulai enggau sektor nya ba Bilik Aum Opis Pengarap Islam Miri ditu ensanus.
Aum nya diatur berindik isu 458 kontena ti mengkang ba Palan Penyangkai Kapal Miri.
Maya aum nya, Lee minta raban Kastam enggau Pelan Penyangkai Kapal Miri ngambika gawa luar jam opis dikena nentuka penanggul ngemendarka kontena tu diputarka lengkas.
Kededua raban udah besetuju enggau sedia deka mutarka lengkas proses ngemendarka kontena ba Palan Penyangkai Kapal Miri taja ba ba luar jam opis iya nya enggau penetap ejen nganjung barang mantaika peminta nya tumu agi.
Lee madahka, nengah aum ke udah diatur maya pagi nya, nyadi isu kontena ti mengkang enda dipansutka tu udah ulih diputarka.
Nangkanka nya, ejen nganjung barang enggau kompeni kapal beterima kasih ngagai Lee laban pengeransing iya mutarka penanggul nya.
Sama bisi datai iya nya pemesai ari Opis Menteri Perengka Pengangkut Sarawak, Opis Residen Bagi Menua Miri, Opis Kastam DiRaja Malaysia, Lembaga Pelabuhan Miri, Opis Tasik Pampang Sarawak Miri, kompeni kapal enggau ejen nganjung barang.