KUCHING: Sarakup Indu Dayak Sarawak (SIDS) begulai enggau Gerempung Graduet Dayak Sarawak (SDGA) deka ngatur Webinar ke diberi nama ‘Community Resilience In The Midst Of The COVID-19 Pandemic’ kena 18 Julai 2020, pukul 8 malam.
Chairman SIDS, Dato Alice Jawan madah sereta ngarapka Webinar keterubah ti diatur dua gerempung nya sereta bulih timbal ti manah ari mensia mayuh.
Objektif Webinar nya diatur ku iya, kena nyerungkai pemar, peluang sereta ‘rega komuniti’ begulai lebuh napi pandemik nya kelimpah ari meri motivasyen nengah inisiatif positif ti dipekunsi speaker.
“Tu Webinar keterubah diatur begulai entara SIDS enggau SDGA. Tagit kami abis nadai 200 iku pesereta tang kami melabaka pesereta ke deka datai mayuh ari ke ditagit nya.
“Batang tuju Webinar tu iya nya bekunsi penemu pasal pengeliat raban bansa pengudah COVID-19, chara raban bansa ulih besukung pangan diri ti dipejuraika tiga speaker dalam bidang ekonomi, mensia mayuh enggau pengawa dagang.
“Nelebaka diri enggau chara idup baru siti pekara ke patut lalu kitai semua patut bejalaika pengawa kitai kitai,” ku iya madah ngagai Utusan Borneo.
Alice ti mega Sekretari Mendam Opis Menteri Utiliti deka meri meri jaku pengelalu lalu tiga iku speaker ti bejakuka pasal tajuk nya, iya nya Fellow, Academy of Science Malaysia Assoc. Prof Dr Madeline Berma; TSEJRC & Dean, Faculty of Human Management & Science UPMKB Prof Dr Jayum Jawan enggau Managing Director of Borneo International Exhibition & Founder of Tenun Fiona Marcus Raja. Lalu moderator iya nya Mandal Presiden SDGA & Indu SDGA Dr Florianna Lendai.
“Pengawa ngerejista masuk Webinar diatu benung dibuka ba bit.ly/TogetherSIDSSDGA2020 lalu bisi diiklan nengah media sosial SIDS enggau SDGA,” ku iya.
Berebak enggau tu Alice ngarapka SIDS enggau Raban Indu SDGA ulih nempa kerejasama enggau gerempung ukai dikuasa perintah (NGO) ke bukai jemah ila.