Anda di sini

Semua raban patut bekerejasama mutarka penanggul ti nyadi ketegal COVID-19

Advertisement
 Sekeda raban ti sama bisi enggau program nya begulai enggau Talib ti sama mantaika buah penemu bekaul ‘Impak Integriti dan Urus Tadbir Baik Pasca COVID-19’.
NINGA PENERANG: Sekeda raban ti sama bisi enggau program nya begulai enggau Talib ti sama mantaika buah penemu bekaul ‘Impak Integriti dan Urus Tadbir Baik Pasca COVID-19’.

BINTULU: Tiga pekara ti diperatika dalam pengawa mutarka penanggul ti nyadi ketegal pandemik COVID-19 ke nyadi ba selampur dunya nyengkaum di menua tu entara nya empas, polisi enggau bakani bejalaika polisi nya.

Menteri di Opis Kepala Menteri (Integriti enggau Ombudsman) Datuk Talib Zulpilip madah, taja Malaysia udah ditukuka ba dunya nyadi menua ti mujur mutarka penanggul pandemik COVID-19, tang kitai patut terus ngasika Prosedur Operasyen Standard (SOP) ngambika penanggul pandemik tu enda nyadi baru.

“Kitai patut mutarka penanggul ti nyadi ketegal pengelekai igi penyakit tu. Tiga pekara ke patut diperati iya nya empas, polisi enggau bakani bejalaika polisi nya,” ku iya lebuh bejaku ba Program Bual Bicara Integriti ti berandauka pekara bekaul ‘Impak Integriti dan Urus Tadbir Baik Pasca COVID-19’ (The Impact of Integrity and Good Governance Post COVID-19) ke dipancharka terus nengah laman ‘Facebook’ rasmi Unit Komunikasyen Perintah Sarawak (UKAS) bedau lama ti udah.

Program tu mega udah dipujurka raban pengereja pengawa Unit Integriti enggau Ombudsman Nengeri (UNION) sereta staf UKAS Opis Kepala Menteri Sarawak.

Pematak randau program tu udah dipejalaika Profesor Fakulti Keusahawanan dan Perniagaan Universiti Malaysia Kelantan Profesor Dr Bala Parasuraman.

Ku Talib madah, kitai patut meda empas ekonomi enggau pengidup peranak ketegal COVID-19, semua orang bisi polisi lalu pengudah dipansik tu bisi mayuh sebaka.

“Tu endang beguna laban nyema manah, nya alai pengawa kitai (mutarka penanggul COVID-19) deka mujur. Pengudah nya pekara tu deka ngayanka empas global enggau semua pengidup, siti dunya ti napi penusah COVID-19 ulih dipeda endang pedis,” ku iya.

Bakani deka mualika pemanah gaya dunya nyengkaum Malaysia ku iya, tu kebendar pengarap enggau aspirasyen kitai iya nya mulaika pemanah dunya, menua Malaysia enggau gaya pengidup rayat.

Taja pia, ku iya nambah, nya begunaka pengeransing ari semua raban ukai semina perintah aja tang kaban komuniti enggau rayat ke alai patut bebendar deka nentuka pengarap enggau aspirasyen nya ulih dijapai.

“Nama ti udah nyadi endang mayuh ripot ari Bank Dunya, International Monetary Fund (IMF), Bank of England enggau semua ejensi ti madahka ekonomi dunya balat kena empas ketegal COVID-19 taja pan bisi pakej bantu (rangsangan).

“COVID-19 meri empas ngagai selampur dunya lalu ekonomi Malaysia diperambu kurang empat peratus baka ti diripotka Asian Development Bank kena (19 Jun nyin tadi). Tu ukai ditempa sengapa tang dipansik ari gerempung ejensi ti ulih dipechaya. IMF, Bank Dunya, Asian Development Bank, semua udah ngaga pengawa mansik, nya penanggul ti amai nyadi lalu ukai semina ditempa sengapa tauka analisis ari orang siku-siku,” ku iya nerang.

Beserimbai enggau nya, ku iya, penanggul tu sigi besai, dikena ngerundingka empas ekonomi baka tu, nya alai tanggungpengawa integriti enggau pengawa ngatur ti manah dalam bejalaika polisi nya patut digaga.

Ku iya nandu, paling muntang iya nya bejalaika pengawa enggau lurus sereta komited, gaga nama ti betul lalu kitai patut ngasika undang-undang sereta prosedur, meri bantu enggau betul, jampat sereta engkeman lalu meri penerang ti bisi asil.

“Bejalaika pengawa enggau lurus, (tang) nyema ngaga pengawa lalu nadai runding ti lurus enggau komited, pengawa nya enda ulih digaga enggau manah. Nyema kitai deka mantu, kitai patut ngaga enggau betul,” ku iya.

Nama ti pemadu dikemerat iya nya penerang ti dipadah nya enda bula lalu nadai utai dipelalai dalam pengawa meri bantu ari sukut pengelantang pendiau. Ambika chunto ari orang siku-siku enda ibuh madahka bantu nya ari ejensi ti bekaul tauka palan servis, ku iya nyemetak.

“Enda salah mantu, aku meri besai terima kasih ti bela nambah (bantu) ngambika sama mantu tang bantu nya patut betul, jampat enggau engkeman,” ku iya.

Bekaul enggau pekara nya, semua raban enda ibuh belaya enggau meri penerang ti salah tang tu mih maya nya kitai bekerejasama enggau mayuh rayat Malaysia ba semua renggat umur nyengkaum renggat baruh ti bejalaika tanggungpengawa enggau lurus sereta nitihka undang-undang laban enti nadai nya tusah pengawa sereta program perintah dipejalaika.

Di Sarawak, ku iya, perintah ari baruh Kepala Menteri Datuk Patinggi Abang Johari Tun Openg enda terunda-runda ngemeranka integriti lalu nya ukai masau jam deka nyapai tikas integriti ti tinggi, penyalah makai suap ulih dikurangka lalu Sarawak mansang nyadi sebuah nengeri ti bisi integriti ke tinggi.

“Aku ngarapka kitai sama bela nyukung pengandal perintah dalam nyapai tikas integriti di Sarawak. Kitai ulih berasai temegah ati laban ulih mutarka penanggul taja ukai 100 peratus berindik ari gaya ekonomi ti bedau manah, ukai semina di Malaysia tang mega di selampur dunya.

“Nyadi siku ari rayat, aku bekunsika pengandal ngambika kitai bela beserkaup, enda belaya, patut bekerejasama enggau perintah, rayat sereta ketuai di semua renggat,” ku iya nambah.

Kelimpah ari nya, (menua) kitai mujur ditukuka dunya, ti udah ulih mutarka penanggul COVID-19 tang ukai reti nya kitai likun, COVID-19 ulih datai, kitai tau meda di Amerika Syarikat ke alai COVID-19 ngelekai lalu majak nyadi, nya menua mansang.

Berindik ari nya, kitai ti nyadi rayat patut nitihka undang-undang, beserakup laban nyema begulai pengawa kitai majak muntang ti deka mulaika pemanah menua, ekonomi, kereja sereta ngelempungka tating penusah rayat.

Ku iya nerang, aspirasyen ukai semina muntang dijapai tang nyema rayat begulai ti enda ngira politik, nitihka undang-undang, ngembuan ulah ti manah sereta disiplin, nya deka nyadi pelasar dalam nyapai aspirasyen ti dikingin.

“Aku pechaya kitai deka terus menang lalu ditukuka mujur ari menua bukai,” ku iya seraya madahka integriti ti dikemeran nyadi muntang laban nya bepun ari diri empu.

Advertisement