KUCHING: Pekara pengelikun ba Palan Nyeridi Anak Mit (Taska) enggau Tabika ti ari baruh Opis Penyerakup Menua enggau Integrasi Nasional (JPNIN) ba Sarawak deka dikemanahka agi kena nyaga pengelikun anak mit.
Menteri Penyerakup Menua Datuk Halimah Mohamed Sadique madahka opis menteri iya deka meda baru pekara pengelikun ba Taska enggau Tabika serata menua nyengkaum ba empat Taska enggau 172 Tadika JPNIN ba nengeri tu.
Kena nentuka pengelikun anak mit ke datai belajar dikemeratka, ku iya, Taska tauka Tabika patut nitihka atur ke udah ditetapka Opis Bomba enggau Penyelamat Malaysia (SOP).
“Aku ngarapka udah tu, kitai meda baru (atur) lebih agi bekaul enggau pengelikun Tabika (sereta Taska) kitai.
“Kitai mega patut mansutka ungkup belanja enggau lengkas kena ngemetulka (nama ke patut bekaul enggau pengelikun).
“Nya alai Opis Menteri nengah opis, nengah direktor nengeri enggau nengah semua pemesai opis penyerakup pelilih menua patut meda baru pekara ti bekaul enggau pengelikun tu, laban tu bekaul enggau anak ke datai ngulihka pelajar ba tikas anak mit,” ku iya.
Halimah mansutka pekara nya ba aum pengarang berita pengudah iya bejalaika pengawa ngabas Taska Genius Perpaduan ba Kompleks Persekutuan Sarawak ba Simpang Tiga ditu, kemari.
Berindik ari nya, ku iya bejaku baru madah, pekara pengelikun ukai semina bekaul enggai pengelikun nyendiaka pemakai aja.
Nitih ku Halimah ba aum pengarang berita ke sama, sepenyampau RM459,966 dikena bejalaika operasyen pengudah COVID-19 ti diungkup ngagai Skim Rondaan Sukarela (SRS), Taska Genius Perpaduan enggau tabika Perpaduan.
“Sehari tu (kemari) kitai mega nyuaka RM459,966 ngagai perintah nengeri kena mantu bejalaika aktiviti (meli kereban PPE) pengudah COVID-19,” ku iya seraya madahka replika chek nya udah disuaka ngagai Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah.