Anda di sini

Kaul manah UNION Sarawak, SPRM ulih nagang penyalah makai suap

Advertisement
 Talib (dua kiba) nerima tepa ari Zaki (dua kanan) seraya dikemataka Adana (kiba).
TEPA: Talib (dua kiba) nerima tepa ari Zaki (dua kanan) seraya dikemataka Adana (kiba).

BINTULU: Kaul manah entara perintah nengeri Sarawak nengah Unit Integriti enggau Ombudsman Nengeri (UNION) Sarawak enggau Komiti Nagang Pengawa Makai Suap Malaysia (SPRM) dikearap terus tegap dalam pengawa nagang penyalah makai suap sereta ngemeranka integriti di nengeri tu.

Menteri ba Opis Kepala Menteri (Integriti enggau Ombudsman) Datuk Talib Zulpilip madah, UNION ti ditumbuhka kenyau taun 2017 ari baruh portfolio Integriti enggau Ombudsman Sarawak dikearap ngambika terus bisi kaul ke manah enggau SPRM.

“Kaul ti ditanggam tu patut dijaga enggau memanah,” ku iya nerang lebuh ti nerima penemuai meri basa ari Direktor SPRM Sarawak Zaki Hassan sereta sekeda pemesai kanan SPRM Sarawak, kemari.

Sama bisi ngelaluka penatai bala pemesai kanan SPRM Sarawak tu iya nya Direktor UNION Opis Kepala Menteri Adana Jed enggau pemesai kanan UNION.

Talib dalam tetiap program suah madah ngambika semua raban ngemeranka integriti dalam pengidup ninting hari kelebih agi ungkup tetiap ejensi di nengeri tu.

Iya mega nandu pengeransing Kepala Menteri Datuk Patinggi Abang Johari Tun Openg bekaul integriti enggau akauntabiliti dalam bejalaika tanggungpengawa kelebih agi pekereja perintah enggau pengari rayat perintah.

Perintah Sarawak endang ngangkatka integriti enggau ngemeranka pengawa nya dalam ejensi perintah enggau rayat di nengeri tu dikena nentuka rayat sereta nengeri tu seruran ba gaya ti manah.

Advertisement