BINTULU: Menteri Muda ba Opis Kepala Menteri (Undang-Undang enggau Adat Bumiputera) ti mega Kaban Kunsil Nengeri Kakus, Datuk John Sikie Tayai nampung program ngabas projek Program Transformasyen Menua Pesisir (RTP) ba kandang menua Bawan, Pengkalan Lobang, Sungai Duan enggau Lubok Bukut, kemari.
Iya ti mega disempulang Penulung Injinir Opis Kereja Raya (JKR) Bagi Menua Sibu Ir Minjon Simanding enggau staf JKR Sibu.
Entara ti dilawa iya nya projek gelanggang futsal Rumah (Rh) Nyaun, projek jalai mua Rh Jeffery Irut, Rh Tangkun enggau Rh Minggu sereta projek ngemanah jalai ke Rh Gajah enggau Rh Latit sereta projek ‘Langkau Penganti’ Rh Steven Ansi.
Beserimbai enggau nya, Sikie mega udah nyuaka chek geran Projek Mit Menua Pesisir (MRP) sepenyampau RM10,000 ngagai Komiti Pemansang enggau Pengelikun Genturung Pendiau (JKKK) Rh Empenit Pengkalan Lobang Mukah nyengkaum chek MRP sepenyampau RM8,000 ungkup Gerempung Apai Indai enggau Pengajar (PIBG) Sekula Primari (SK) Pengkalan Lobang.
Insentif nya diberi ungkup sekula tu laban ti udah bulih penyulut 100 peratus pas dalam pemutus peresa Ujian Penilaian Sekolah Rendah (UPSR) 2019.
Sikie madahka, tetiap sekula ba DUN Kakus ti nyapai pemutus 100 peratus dalam UPSR sereta bulih 100 peratus nembiak tauka bulih 5A enggau lebih.
“Kitai meri insentif nya nyadika kelai meri basa, ngenang pengeransing enggau tanggungpengawa raban sekula, PIBG sereta bala nembiak ti bebendar nyapai penyulut nya ke lalu nyadika peransang ngagai tetiap nembiak sekula di kandang menua tu,” ku iya.
Ku iya madah, endang nyadi tanggungpengawa begulai enggau raban sekula sereta PIBG dalam nentuka sebuah sekula nya nyapai pemutus ti nyulut dalam pelajar.
“Apai indai mega dipinta matau anak sida ngambika enda tepejuh enggau aktiviti ti enda menuku kelebih agi maya timpuh Atur Nagang Pemindah (PKP) ke alai bala anak enggai enda pan kemisi panjai diau ba rumah,” ku iya seraya ngarapka kemisi tu ulih dikena ke pemaik anak sida dalam ngulihka penemu.
Ku iya, bidang pelajar endag beguna ke pengidup anak jemah ila kelebih agi dalam proses sida ngiga pengawa lalu ngangkatka tikas pemanah gawa sida.
Berindik ari nya, ku iya, perintah nengeri ari baruh Gabungan Parti Sarawak (GPS) bebendar deka nyendiaka peluang gawa ngagai bala anak Sarawak nengah mayuh macham projek ti dipejalai entara nya Pengawa Ngaga Loji Methanol (Sarawak Petchem) di Similajau, Tanjung Kidurong, Bintulu.
Ketegal nya mih iya ngarapka bala anak nengeri tu patut ngena peluang nya ngenegapka pengelandik diri dalam pelajar ngambika ulih ngisi pengawa puang dalam projek bepelasarka industri minyak enggau gis nya.