Anda di sini

Pemutus ADUN Kalaka dipuji

Advertisement
 Abang Johari ba aum pengarang berita kemari beterima kasih ngagai Abdul Wahab ti meri peluang ngagai ketuai biak ba PRN12 ila.
BEDAU TEMU SAPA NYILIH: Abang Johari ba aum pengarang berita kemari beterima kasih ngagai Abdul Wahab ti meri peluang ngagai ketuai biak ba PRN12 ila.

KUCHING: Presiden Parti Pesaka Bumiputera Bersatu (PBB) Datuk Patinggi Abang Johari nyambut manah seraya muji ulah Kaban Kunsil Nengeri Kalaka,Datuk Abdul Wahab Aziz ti nyurutka diri ari pengawa politik sereta meri awak ngagai orang biak.

Abang Johari madah ulah ti baka, udah nyadi budaya dalam PBB laban deka meri peluang ngagai ketuai biak.

Iya ti mega Chairman Gabungan Parti Sarawak (GPS) ngarapka parti komponan baka Parti Rakyat Sarawak (PRS), Parti Sa’Ati Rakyat Sarawak (SUPP) enggau Parti Demokratik Progresif (PDP) ngembuan budaya ti dikemeranka PBB nya.

“Aku meri terima kasih ngagai Yang Berhormat Datuk Wahap ke ngaga pemutus nyurutka diri.

“Nya budaya kitai dalam PBB. Ketuai PBB, sida nemu maya diri patut meri awak ngagai orang biak.

“Aku ngarapka parti bukai baka nya mega,” ku iya lebuh ditanya bekaul enggau pekara nya.

Iya dikerandau ba aum pengarang berita pengudah Pengerami Bejadi sereta Nemuai Saraya Kereja Projek Bekal Ai Di Bagi Menua Samaraha,n ti diatur ba Ferry Ramp Lama, Seruyuk, ba Sebuyau ditu, kemari.

Bekaul enggau chalun ke nyilih Abdul Wahab ba Kunsil Nengeri (DUN) Kalaka maya Pengawa Bepilih Nengeri Ke-12 (PRN12) ke deka datai, Abang Johari madahka pekara nya bedau diputuska. “Sapa ke nyilih iya, nya nganti dulu, iya (Abdul Wahab) ulih meri meri nama (chalun) tang pemutus nya deka ditentuka udah tu ila, pengawa bepilih (PRN12) agi jauh,” ku iya.

Ensanus, Wahab Aziz maya ke ngulu Aum PBB N38 ba Bilik Aum PBB N38 Kalaka madahka diri ngetu ari pengawa politik.

Iya madahka pemutus nya udah digaga tumu ngambika ketuai parti ulih sedia nentuka sapa bagi ke patut nyilih iya lalu ulih ngenyemakka diri enggau rayat ba DUN Kalaka.

“Entara kebuah bukai aku ngaga pemutus tu iya nya ketegal faktor umur sereta udah lama nyadi pengari rayat sitak tu.

“Nya kebuah aku deka meri peluang enggau awak ngagai raban ke biak agi, ti regas sereta ngembuan penau ti dikearap bejalaika pengawa nyadi pengari rayat sitak tu, ngambika majak gawa seraya nyingkang maju begulai enggau rayat sitak tu dudi ila.

“Ngambika penuduk ti puang tu bisi orang nyilih, aku udah ngenataika langgur penemu ngagai bala ketuai pemadu tinggi parti nyenglaum Kepala Menteri, awakka meri peluang ngagai siku kaban PBB ti udah mayuh ngereja pengawa manah, regas mindah kin kitu ngelama tu sereta seruran meri sukung ngagai parti kitai, iya nya Sapit Ketuai PBB N38 Kalaka, Kunsilor Mohamad Duri,” ku Abdul Wahab.

Ku wahab, sebedau ngaga pemutus nya, iya empu udah ngaga tinjau sereta mendingka penemu ari semua ba renggat tuai nembiak redak, bekaul langgur penemu nya.

Abdul Wahab udah enggau pengawa politik kenyau ari taun 1987 lalu nyadi pengari rayat ba DUN N38 Kalaka pengelama enam penggal, iya nya ari taun 1996 nyentuk ke diatu.

Pengawa ti kala dipangku Abdul Wahab sekumbang nyadi pengari rayat sitak nya, kala nyadi Menteri Muda Pemansang Menua Pesisir (2010-2013), Menteri Muda Pengawa Berumah enggau Pengatur Mengeri enggau Menteri Muda Pemansang Tanah (2013 – 2016).

Advertisement