SELANGAU: Menteri Muda ba Opis Kepala Menteri (Undang-undang enggau Adat Bumiputera) Sarawak Datuk John Sikie Tayai ngansak peranak di menua pesisir ngiga sereta milih palan alai berumah ke engkeman, likun lalu jauh agi ari sungai, ngambika enda napi penusah ampuh bah.
Nitih ku iya, tu dikena nyamin pengelikun peranak menua pesisir kelebih agi lebuh musim ujan lalu ai sungai deka besai, ti ngujungka ampuh bah tau nyadi sebarang maya.
“Mayuh peminta diterima kami kena ngerataka palan berumah panjai ke baru.
“Kebuah pia, rumah panjai ke baru nya bepalan ba endur ti suah ampuh bah, tebal agi ampuh bah ke besai ti kala nyadi ba pun taun 2018 suba.
“Tu berindik ari suba lebuh kandang menua tu bedau datai jalai alun nya kebuah mayuh rumah panjai digaga ba tebing sungai,” ku iya pengudah ngulu pengawa ngabas Palan Projek Program Tranformasyen Menua Pesisir (RTP) enggau Program Begulai ba Sungai Bawang, Sungai Tau enggau Sungai Anak, kena Hari Satu minggu tu tadi.
Nyempulang iya, Pemesai Administrasyen Opis Pelilih Menua Selangau Anyie Aweng enggau bala staf ari Opis Pelilih Menua Tatau sereta Opis Kereja Raya (JKR) Bagi Menua Sibu.
Dalam program tu, Sikie enggau raban iya udah bejalai meresa semua projek pemansang ti benung digaga sereta deka dipejalaika ba Rumah Panjai Sawan Sungai Bawang, Rumah Panjai Umpang Sungai Tau enggau Rumah Panjai Dicka Sungai Anak.
Berebak enggau nya, iya bisi ngabas sereta betemu enggau peranak ba Rumah Panjai Jentang di Sungai Anak, lalu nyuaka chek Projek Mit Pelilih Menua Pesisir (MRP) penyampau RM15,000 ngagai Komiti Pemansang enggau Pengelikun Genturung Pendiau (JKKK) rumah panjai nya.