PAKAN: Kaban Kunsil Nengeri Pakan, Tan Sri William Mawan Ikom nyambut manah perambu Pakan bisi peluang nyadi siti ari palan dagang temuai ke baru di Sarawak.
Iya madahka Pakan ngembuan mayuh palan enggau program dikena matak temuai datai ke menua nya.
“Ke diatu, pengerami ninting taun ke diatur ba Pakan iya nya ‘Pesta Pakan’ enggau Lumbong Panglima Rentap ba Bukit Sibau, Sungai Wak, tu udah tentu nyadi siti ari pematak temuai ngambika datai ditu.
“Taun ke sebedau tu siti program ‘Ekspedisi Kenderaan Pacuan Empat Roda’ bisi diatur ti nyadi sebagi ari program Pesta Pakan, lalu program ke sama nya ulih dikemanahka agi sereta diatur kediri jemah ila.
“Opis Menteri Dagang Temuai Malaysia (MOTAC) ari perintah besai enggau perintah nengeri mega dikelaluka ngelala bagi rumah panjai ke ulih diubah nyadi rumah panjai ‘homestay’,” ku iya.
Iya madahka nengah pemisi program dikena matak temuai nya, tentu deka ngenyakahka agi pengawa ngelakuka produk dagang temuai ke udah bisi sereta ngemasukka program nya dalam kalendar dagang temuai Sarawak.
“Siti kelai baru di Pakan iya nya Pintu Penama Besai Pakan ti berega RM100,000 sereta diatu benung digaga lalu deka ditembuka enda lama agi.
“Kitai enggau rayat di Pakan nyukung penuh inisiatif perintah besai (MOTAC) ti bendar ngelakuka Dagang Temuai Domestik,” ku iya seraya madah inisiatif nya udah tentu ulih nyungkak tikas sosio-ekonomi peranak ba Pakan.