Anda di sini

SPR nadai nerima pemadah sentang PRN12

Advertisement

KUCHING: Sapit Chairman Opis Pengawa Bepilih (SPR) Dr. Azmi Sharom madah, nyentuk ke sehari tu sida nadai nerima pemadah sentang ngerak Kunsil Negeri (DUN) Sarawak tauka pengawa bepilih nengeri (PRN) ke-12.

Taja pia, iya madahka SPR seruran sedia napi sebarang maya PRN ke-12 diatur dalam timpuh ke semak tu.

“Nyentuk ke sehari tu, SPR nadai nerima sebarang pemadah bekaul Pengawa Bepilih Nengeri Sarawak (ke-12).

“Enti Kunsil Nengeri (Sarawak) direrak, pengawa SPR iya nya ngatur pengawa bepilih dalam timpuh 60 hari pengudah hari bulan ngererak (DUN) nitihka Fasal (1) Pekara 21 Konstitusyen Nengeri Sarawak,” ku iya nengah penerang media kemari.

Ku Azmin, ari baruh Fasal (1) Pekara 21 Konstitusyen Nengeri Sarawak, ‘Enti Kunsil Nengeri direrak, pengawa bepilih deka diatur dalam timpuh enam puluh hari (60) ari hari bulan ngererak lalu Kunsil Nengeri ke baru deka dikangauka baum ba siti hari bulan enda ngelui ari seratus dua puluh (120) hari ari hari bulan nya’.

Timpuh Kunsil Nengeri (DUN) Sarawak deka abis dalam bulan Jun taun baru, pengudah PRN ke-11 diatur kena 7 Mei 2016.

Taja pia, bisi berita selebubu madahka PRN ke-12 engka diatur ujung taun tu pengudah berundingka mayuh bengkah pekara baka pengusut ekonomi nyengkaum dipelabaka rayat nadai agi kereja ti tau meri empas  ngagai rayat.

Berebak enggau nya, Dr Azmin madahka penyampau pengundi ke berejista di Sarawak nyentuk 31 Mac 2020 bisi 1,246,001 iku pengundi, ke alai 7,310 iku nya baru ngerejista diri.

Ku iya, penyampau pengundi ke berejista nya ungkup Rejista Pemilih Suku Taun Keterubah 2020 ti digazet kena 1 Julai 2020.

“Nyentuk 31 Mac 2020, 1,246,001 iku pengundi berejista di Sarawak lalu ari penyampau nya 7,310 iku baru baru ngerejista diri ti diterima SPR ba suku keterubah taun tu.

“Rejista baru tu enda nyengkaum pengundi ke beumur 18 nyentuk 20 taun,” ku iya.

Ku Azmin, pengawa bejalaika Rejista Automatik Pengundi (AVR) semina dipejalaika abis laun dalam bulan Julai taun baru.

Ku iya, pengawa bejalaika AVR nya mungkur pengawa nyendiaka ngubah Atur Pengawa Bepilih (Rejista Pemilih) 2002 enggau undang-undang bukai ke bekaul, ungkup prosedur operasyen standard (SOP)enggau ungkup sistem infrastruktur ungkup pengundi ke beumur 18 taun enggau rejista automatik.

“Nya alai, rayat Malaysia ke beumur 21 taun ke baruh bedau tau enggau ngundi sebedau Julai 2021,” ku iya.

Advertisement