MARUDI: Kaban Kunsil Nengeri (ADUN) Marudi, Datu Dr Penguang udah ngatur semilan sesi Randau Begulai enggau bala Kunsilor Opis Pelilih Marudi, Pemancha Penghulu, Tuai Rumah, Kapitan enggau sekeda ketuai Gerempung Ukai Dikuasa Perintah (NGO) ungkup N.76 Marudi. Randau nya udah diatur kena 1 ngagai 5 Julai 2020 empai lama.
Batang tuju randau nya diatur iya nya deka mendingka timbal ti dikenataika iya kenyau empat taun udah nyadi Pengari Rayat ditu kelimpah berandau ke pekara bukai dikena ngangkatka agi sitak N.76 Marudi.
Penguang ke mega Menteri Muda Kaunsil Kandang Menua enggau Pengawa Berumah laban iya meda penanggul pemadu besai ke bisi dibantai baka bekaul enggau bekal elekterik, bekal ai beresi enggau ngemanahka jalai sereta telekomunikasyen enggau internet kelimpah isu tanah NCR.
Penguang madah, pengudah nyadi pengari rayat ditu pengelama empat taun ke udah, iya komited deka mutarka isu ke udah lama bedau diputarka. Kebendar, pekara tu mih meransang enggau ngasuh iya ngetu gawa nyadi Sekretari Mendam ba Opis Menteri di Sarawaklalu bediri minta pilih ba PRN11, 2006 ketegal deka ngangkatka enggau mantu N.76 genturung pendiau iya.
Pengelama empat taun kepenudi, iya udah gawa bebendar ngulihka bantu ari perintah nengeri enggau bejalaika mayuh macham projek infrastruktur ba baruh wang turu khas sepenyampau urung RM500 juta.
Iya mega udah nerima komen sereta perambu enggau ati ti lantang, iya pechaya komuniti ditu deka terus beserakup, liat ati sereta bekerejasama mutarka penanggul enggau isu ke udah lama ditapi.
Taja pia, Penguang ngaku semua projek agi bedau chukup enggau N.76 begunaka mayuh agi projek infrastruktur.
Penguang meri besai terima kasih ngagai sida ti datai meri sukung ngagai iya.
Sama bisi ngulu tetiap Sesi Randau tu iya nya Sekretari Politik Kepala Menteri, Alexander Asing Sadai, Pemancha Engah Nuga enggau sekeda Penghulu ari kandang menua nya.
Tetiap sesi randau enda tau digulu lebih ari 250 iku baka ti udah ditetapka maya Atur Nagang Pemindah Mulaika Pemanah (PKPP) tu.