SIBU: Industri muzik Iban lenyau siku penanyi lelaki ke landik sereta ngembuan sada nyawa ke chukup manah, ti tebilang enggau lagu ‘Siti Sumpah Siti Janji’ iya nya Dominic Christy, pengudah iya lesi kena lemai ensanus.
Nitihku Jeffery Panting, 48, menyadi niang ti tuai madahka penanyi ke beumur 37 tu mutuska seput urung pukul 10.32 malam ba Sepital Sri Aman, kena 6 Julai tu ensana.
Ku iya, keterubah sida sebilik nemu niang bisi penyakit riman tungkul sengayuh, iya nya kena bulan dua tu tadi.
“Sebedau tu, iya suah madahka diri pedis sereta berasai chelap ba kaki. Bulan dua taun tu tadi, kami nganjung iya beperesa pengerai ngagai klinik luar.
“Ari nya tadi, niang ditemu kena penyakit riman tungkul sengayuh lalu penyakit iya maya nya endang udah ba renggat keempat,” ku Jeffery lebuh ditelefon pengarang berita pagi kemari.
Kelimpah ti nyadi penanyi, niang kala bekereja ba sebuah kompeni nyadi siku kerani, lalu kala muka dagang nyual mi kampua ba kedai makai di Bintulu.
Berindik ari nya, niang Dominic deka disengai ba Rumah Lot 67 Taman Gamang, Sri Aman, lalu deka diintu bala mayuh sereta disembiang kena 8 Julai pukul 5 lemai, lalu deka ditumbak ba Pendam Kristian Anglika Stutong, Sri Aman kena 9 Julai 2020.
“Nuju semua kaban belayan enggau bala artis ke udah ngelala sereta kala begulai enggau niang, tau sampal datai nyengai niang kitu.
“Tu mih ke tanda kitai meri basa kepenudi ngagai niang, nya alai kami sebilik meri awak nyengai pengelama tiga hari tu (7-9 Julai 2020),” ku Jeffery nambah.
Ke penemu rama, lagu ‘Siti Sumpah Siti Janji’ udah ngangkatka nama niang dalam industri muzik Iban tu, lalu iya udah masuk ‘Anugerah Carta Sapa Juara’ (ACSJ) Waifm RTM, taun nyin kemari.
Apin lama udah, lagu ti pemadu baru ari niang iya nya ‘Nyerauh Dalam Ati’, mega udah dichalun ba Carta Sapa Juara 2020.