SIBU: Raban tuai rumah ke udah dichiri sereta disukung penuh peranak ba rumah panjai, tang apin ngembuan setipikit nyadi tuai rumah, minta perintah nengeri ngenukuka pengawa nyiri sida enggau sah.
Peminta tu disadaka Kelab Tuai Rumah Dichiri Rayat bagi menua Ngemah, ti ditumbuhka apin lama ke udah.
Nitihku sekretari kelab nya, Tuai Rumah (Tr) Brian Langit, pengawa numbuhka serakup tu deka nyadi jematan ngambika perintah ulih mendingka peminta sida.
“Pengawa numbuhka skelab tu ukai dikena ngelaban perintah, tang semina deka ngulihka pengentap penemu ari perintah,” ku Brian ti udah nyadi tuai rumah pengelama 18 taun, kenyau ari 2018.
Ku iya, enti enda dichiri enggau sah, sida enda bulih sebarang bantu enggau elawin ari perintah, ti ulih dikena ngemansangka rumah panjai.
Nangkanka nya, ku iya madahka sekeda ari raban tuai rumah tu nyau bepupu duit enggau bala rayat sida empu dikena nampung ungkus belanja ngambika ulih ngatur pengawa bekaul enggau rumah panjai sereta perintah.
“Baka ti udah ditemu kitai, apin lama ke udah perintah nengeri deka meri elawin ngagai sekretari JKKK (Komiti Pemansang enggau Pengelikun Genturung Pendiau) Tuai Rumah ti udah sah, sepenyampau RM300.
“Tang ba kami, kenyau ari suba endang udah nyadi mata enggau pending sida, lalu mantu rayat ke dipegai kami nanggung ungkus belanja kediri empu kena ngatur pengawa perintah,” ku iya dalam siti penerang, kemari.
Chairman kelab tu ke baru dichiri, Tr Lembat Atau madahka iya minta perintah nengeri ngelunggarka penetap nyiri tuai rumah tauka ketuai bansa, laban mayuh raban tuai rumah ti dipilih rayat enda bulih pemaik (elawin) ari perintah nengeri.
“Ngelama tu, kami mih entara raban ti nyadika pun penegap perintah ba renggat nembiak redak kelimpah ti mantu rayat ke dipegai ari baruh kami,” ku iya.
Berebak enggau nya, Tukang Wang kelab tu, Dullah Unja madahka sida bulih sukung ke penuh ari peranak rumah panjai.
“Sida (peranak rumah panjai) nemu kami ngelama tu ngembing JKKK nuju atur ketuai ti tau dikarapka, nya alai sida nemu agi tikas penau kami lebuh nyadi ketuai,” ku iya.
Nambahka nya ku iya, sida napi pemar ngatur sereta ngemudahka pengawa peranak rumah panjai, ti begunaka surat pemendar nyengkaum surat ari Opis Pelilih Menua ke patut dikemendarka siku tuai rumah ti sah sereta ngembuan setipikit.
“Tang kami enda ulih ngaga nenama. Nama tu siti ari pekara ke tau ngenusahka rayat?,” ku iya.
Kelimpah ari nya, sida deka ngatur aum kena 25 Julai tu ila, lalu dipelabaka deka digulu urung 30 iku tuai rumah ke dichiri rayat tang nadai ngembuan setipikit.
Entara pekara ke deka dibantaika ba aum tu ila iya nya, berundingka sereta merambu dikena ngatur pengawa betemu enggau Pemesai Pelilih Menua, Residen Sibu, pengari rayat nyen gkaum opis menteri ke bekaul enggau pekara nyiri tuai rumah tauka ketuai bansa.