MIRI: Bepelasarka pansik udah mantaika 67.1 peratus tauka 385 iku responden enda puas ati enggau tikas pemanah arus internet di Malaysia Timur naka ke diatu, lalu bisi madahka sambung arus internet ti enda kuat, lubah enggau enda tentu lalu bisi mega ti enda kena bungkur akses internet.
Penulung Profesor Pelajar Komunikasyen Northern State University di Abadeen, South Dakota Dr Nuurrianti Jalli madahka pansik ti dirikodka nya ari 15 April nyentuk ke 30 Mei taun tu ti ngaul semua 574 iku responden.
Nitih ku iya, ari penyampau nya 63.1 peratus responden ari Sarawak lalu 36.9 peratus Sabah sereta mayuh ari responden nya diau ba pasar mit (50 peratus), menua pesisir (32.9 peratus) sereta mengeri besai (17.1 peratus).
“178 iku responden (31 peratus) ari menua pesisir Sarawak enggau Sabah mega ngeripotka iya nya sida enggai enda pan pansut ari rumah diri deka ngiga akses internet ti manah, lalu 84 responden (14.6 peratus) madahka sida nadai ngembuan akses internet ba rumah.
“Pansik tu diulih ari responden ke majoriti nya diau ba pasar mit enggau menua pesisir, lalu tu enda mungkur semua peranak Sarawak enggau Sabah laban semina mimit aja responden ari mengeri besai dalam pengawa mansik tu. Pansik enggau silik jemah ila ulih mekuh ngagai sida ke diau di mengeri,” ku iya.
Iya madah munyi nya lebuh ti ditanya Utusan Borneo nengah aplikasyen 'Whatsapp' ditu kemari.
Nuurrianti ti penatai asal ari Miri, Sarawak, madahka pansik iya nya udah mantaika 51.9 peratus tauka 297 responden kala ngeripotka penanggul tu ngagai pengari rayat tauaka kompeni ti nyendiaka servis internet.
Lalu 50.3 peratus tauka 289 responden bisi madahka penanggul nya terus nyadi lalu baka ke nadai pengawa mutarka penanggul nya ti digaga pengari rayat tauka kompeni ti nyendiaka servis internet.
Kelimpah ari ngumpul pansik enggau chara nyaut tanya, Nuurrianti mega bisi intebiu enggau silik 20 iku responden iya nya bala pengajar, apai indai enggau nembiak sekula.
“Aku meda sekeda isu dominan ti dibantaika iya nya monopoli dagang kompeni nyendiaka servis internet ti bekaul enggau perintah, penyambung servis ti lemi ungkup arus mobil ari kompeni telekomunikasyen di menua tu, kurang sukung pengari rayat dalam negika isu tu sereta pamansang telekomunikasyen ti lubah taja langkar deka ngerapitka seraka digital udah dipadahka kenyau ari betaun ke udah.
“Nembiak sekula ti diintebiu mega meri buah penemu iya nya penanggul akses internet ti ngujungka pengajar nganjung kereja sekula nengah Whatsapp lalu nadai pengawa ngajar enggau belajar ti aktif.
“Taja pan pengajar bejalaika kelas nengah chara 'online' ba platform baka Google Clasroom, nembiak mega napi penanggul dalam pekara penyambung (internet) ti suah nyadi,” ku iya.
Nuurrianti madahka dikena ngulihka sambung internet ti manah dikena belajar, nembiak sekula enggai enda pan pansut ari rumah sida lalu ngiga palan ti manah arus internet.
Ku iya, enggau tikas pemisi internet ti kurang di kandang menua pesisir ba Sarawak enggau Sabah tu ti nyadika penanggul ngagai pengajar enggau nembiak sekula bejalaika pengawa belajar nengah chara online lebuh menua ti dituntung penusah ngelaban pandemik COVID-19 kemaya hari tu.