Anda di sini

RM32.2 juta ungkup program pemansang pekebun getah

Advertisement
 Latiff (tiga kanan) disempulang Henry (kanan), Abdullah, Rubiah enggau Salem nanam paung rian 'Musang King' kena ngelai bejadi Opis Baru RISDA Sarawak.
BEJADI: Latiff (tiga kanan) disempulang Henry (kanan), Abdullah, Rubiah enggau Salem nanam paung rian 'Musang King' kena ngelai bejadi Opis Baru RISDA Sarawak.

KOTA SAMARAHAN: Opis Menteri Pemansang Menua pesisir (KPLB) ngungkupka RM32.2 juta ngagai Opis Pemansang Orang Betanam Getah Kebun Mit (RISDA) Sarawak dikena bejalaika program pemansang ungkup 128,000 pekebun getah ba nengeri tu.

Menteri KPLB, Datuk Dr Abd Latiff Ahmad madahka, ari penyampau nya RM25.3 juta ungkup bejalaika pemansang program nanam baru ari baruh Langgur Pemansang Malaysia Lumpar Kesepuluh (RMK-10) enggau RMK-11 ti mungkur kandang ti pemesai 10,798.7 hektar.

"Lalu laluh nya kena bejalaika program ngerembaika fasiliti enggau latih, pengawa dagang, produktiviti enggau pemansang asil baru," ku iya.

Iya madahka nya ba aum pengarang berita pengudah bejadi opis baru RISDA Sarawak ti ngena ungkus belanja sepenyampau RM8 juta ba Kota Samarahan ditu, kemari.

Berebak enggau tu Latiff madah, RISDA nerima ungkup belanja sepenyampau RM521 juta kena ngaturka program pemansang ti mungkur pengawa ngenegapka program nanam baru enggau nyungkakka penatai pemisi pekebun mit nengah aktiviti dagang.

Ku iya, nya mega dikena ngenyakahka agi aktiviti pemansang pekebun mit nengah Program Pemansang Asil Baru Agro Pemakai sereta ngemayuhka agi program ti semak enggau pekebun mit ngambika raban bansa di menua pesisir ulih ngasaika servis ti disediaka perintah.

Nambahka nya, iya muji komitmen ti manah ari semua ejensi ba Sarawak lebih agi Opis Tanah enggau Survei dalam mantu RISDA meri servis ngagai pekebun mit enggau penyulut pemesai kandang endur ditanam baru 27,000 hektar pengelama 10 taun RISDA ditubuhka ba nengeri tu.

Ku iya nerang, pemar tauka penusah ngesahka Tanah Ti Nadai Orang Ngempu ba Tanah Hak Adat Bansa Asal, tang pemar nya diputarka enggau kerejasama ari Opis Tanah enggau Survei Sarawak.

Asil kerejasama nya ku iya, sepemesai 27,000 hektar udah ditanam baru enggau penyampau semua ungkup belanja sepenyampau RM336 juta enggau penyampau staf RISDA bisi 242 iku.

"Penyulut tu nunjukka pengulih RISDA sereta ejensi menua pesisir ba Sarawak ti seruran meri servis ti manah ngagai raban bansa menua pesisir," ku iya.

Berebak enggau nya, bekaul program fasiliti, iya madahka, RISDA Sarawak nerima RM3.7 juta sereta mujur melanjaka 97 peratus ungkup belanja nya kena nyukung 30 Projek Tanam Semula Berkumpulan ti mungkur urung 40 kilometer jalai betanam betupi, 40 unit pembentung enggau 2.02 kilometer sistem parit.

Nitihku iya, RISDA Sarawak mega nerima ungkup belanja sepenyampau RM1.2 juta ti meri penguntung ngagai 406 orang dagang dalam bidang betanam betupi, servis, pemakai enggau sektor begagaka produk.

Ku iya mega, RISDA Sarawak nyuluk deka nempa 76 orang dagang baru ba taun 2020 tu.

Kelimpah ari nya, Latiff madah, opis menteri iya merambu ngenegapka pekebun mit getah ba menua tu kena ngurangka ari bepanggai ngagai eksport getah.

Ditanya pasal iya betemu enggau Kepala Menteri Datuk Patinggi Abang Johari Tun Openg ba Wisma Bapa malaysia kemari, terang iya, penemuai nya iya nya penemuai rasmi ke nengeri tu.

Berebak enggau tu, Chairman RISDA Datuk Mohd Salim Mohd Shariff madahka, sida iya bearap ulih nyungkakka penatai pemisi pekebun mit getah ngagai RM4,000 sebulan nengah aktiviti tambah nengah mayuh macham ekonomi tambah ungkup raban nya.

"Iya dikena ngurangka ari bepanggai ba subsidi, nya kebuah kitai ngatur program mayuh bengkah ekonomi  tambah tu," ku iya.

RISDA bisi empat opis bagi menua ba Sarawak iya nya ba Samarahan, Betong, Sibu enggau Miri kelimpah ari 13 Opis Stesyen enggau 242 staf.

Sama bisi datai Sapit Menteri Pemansang Menua Pesisir Datuk Henry Sum Agong, Tuai Direktor RISDA Abdullah Zainal, Kaban Parlimen Kota Samarahan Rubiah Wang enggau temuai bukai.

Advertisement