Anda di sini

Kolej IBS Miri udah bejalaika pengawa sanitasyen nitihka SOP KKM

Advertisement
 Pengawa meresi tauka manchit sanitasyen ba semua palan ba Kolej IBS Miri.
MERESI: Pengawa meresi tauka manchit sanitasyen ba semua palan ba Kolej IBS Miri.

MIRI: Kolej IBS Miri iya nya siti ari palan pelajar tinggi ti tebilang lalu selalu endur nembiak nyambung pelajar ke tikas ti tinggi ba bidang diploma nyentuk ke master.

Berindik ari penusah penyakit berampit ke bisi nyadi di selampur dunya iya nya pandemik COVID-19, Kolej IBS Miri mega sama bejalaika Prosedur Operasyen Standard sereta garis lalau ti udah dirintaika Opis Menteri Pengerai Malaysia (KKM).

Beserimbai enggau nya, dikena nentuka pengelikun sereta bejejaga ari pengelekai igi penyakit tu, Kolej IBS Miri mega sama udah bejalaika pengawa sanitasyen ba semua palan kolej tu, lalu atur pengawa tu udah betuaika Prinsipal Dr Lau Pun Lee sereta Direktor Maleensa Swee Moi Eng sereta semua staf ke bukai.

Program sanitasyen nya dipunka enggau jaku pengelalu ari Dr Lau lalu pengawa manchit sanitasyen tauka meresi palan nya diteruska enggau dua pemesai bomba Bagi Menua Miri Edwin Bong enggau Alvester Jangen, lalu udah mungkur semua kelas, bilik komputer sereta palan gawa staf kolej nya.

Muakka lemai, atur program diteruska enggau baum nengah aplikasyen 'Zoom Meeting' begulai enggau Dr Anthony Hii lalu batang aum iya nya bekunsika penemu bekaul enggau SOP ti endang patut dititihka kelebih agi maya 'norma' baru tu.

Ku Dr Anthony ngelalau, iya minta semua staf enggau nembiak ti belajar ba kolej nya ngambika sama nyaga pengerai, ngemeranka seraka sosial nitihka atur ti udah ditetapka KKM.

Kelimpah ari nya, Dr Lau mega udah madahka 30 peratus ari nembiak ti udah bulih pemutus peresa SPM ngambi kus ba bidang Diploma Pentadbiran Perniagaan lalu bisi mega nembiak ti udah gawa iya nya 50 peratus ti ngambi bidang Diploma Sekuriti dan Keselamatan.

Berebak enggau nya, Kolej IBS Miri deka nyambung sesi ngajar enggau belajar kena 6 Julai tu lalu bisi mega pengawa ngerejista nembiak baru kena 7 September.

Penerang ti silik bekaul Kolej IBS Miri sereta kus ti bisi diajar ba dia ulih betelefon ngagai lumur 085-438666 tauka telefon terus ngagai Kaunselor Pelajar Ricky ba lumur 012-8991207, Jack Sie 016-2592466, Kenji 013-8652138, Alvester 011-31965281 tauka Karen 014-5974403.

Advertisement