Anda di sini

BERSATU, PAS enda bediri minta pilih ba Sarawak maya PRN12

Advertisement
MASING
MASING

KUCHING: Parti Pribumi Bersatu Malaysia (BERSATU) enggau Parti Islam SeMalaysia (PAS) enda bediri minta pilih ba Sarawak maya Pengawa Bepilih Nengeri Ke-12 (PRN12) ti deka datai.

Presiden Parti Rakyat Sarawak (PRS) Tan Sri James Jemut Masing madahka pekara nya dipadahka Presiden BERSATU Tan Sri Muhyiddin Yassin enggau Presiden PAS Datuk Seri Abdul Hadi Awang.

"Taja pan kededua parti bisi pampang ba Sarawak tang sida iya enda bediri minta pilih ba Sarawak dalam PRN12 ila.

"Pekara tu ukai semina meri jalai ti lantang ngagai Gabungan Parti Sarawak (GPS) ngelaban penyakal tang mega kelai manah parti komponen Perikatan Nasional (PN) bebasaka komitmen mantu GPS maya PRN ila," ku iya dalam penerang berita.

Masing ti mega Sapit Kepala Menteri madahka Muhyiddin begulai enggai ketuai parti bukai sama ngarapka ulih menang maya Pengawa Bepilih Besai Menua Ke-15 (PRU15).

"Ari pansik aku pasal sejarah enggau personaliti ti bekaul dalam parti politik di Semenanjung Malaysia, lebih agi entara BERSATU enggau UMNO, enggau mayuh parti komponen bukai ti numbuhka PN di Sarawak, nya serakup politik ti manah.

"Taja pia, aku arap ari sukut teknikal ti silik dalam serakup PN tu deka ulih diputarka sereta jampat agi manah agi," ku iya.

Enti parti politik ba Semenanjung Malaysia enggau Sabah enda ulih mutarka bida personaliti enggau sejarah sida sebedau belaban, engka dipelabaka PN deka alah.

Siti faktor sama ti ngempungka parti dalam PN begulai iya nya sama nulak Parti Tindakan Demokratik (DAP) nyadi sebagi ari serakup.

Dulu ari nya, Masing madah pekara tu entara ti dikerandauka dalam aum ti diatur pengelama dua jam ba Putrajaya kena Hari Tiga tu tadi ti mungkur semua pemimpin 12 parti komponen PN.

Kepala Menteri Datuk Patinggi Abang Johari Tun Openg  ti mega Chairman GPS ba aum nya madah meri sukung ngagai Muhyiddin nyadi Menteri Besai sereta nyadi tuai PRU15.

Abang Johari mega madah GPS begulai enggau empat parti komponen udah besedia betapi PRN12 ti diatur barang maya.

Empat parti komponen GPS iya nya Parti Pesaka Bumiputera Bersatu (PBB), Parti Rakyat Sarawak (PRS), Parti Sa'ati Rayat Sarawak (SUPP) enggau Parti Demokratik Progresif (PDP).

Advertisement