KUCHING: Apai indai ke bisi anak besekula ba Tadika tauka Prasekula ti ba hari keterubah nganjung anak besekula pengudah ditutup ketegal Atur Nagang Pemindah (PKP) COVID-19, tetap bisi pengirau ati sereta ngarapka anak ulih nitihka prosedur operasyen standard (SOP).
Tinjau Utusan Borneo ba sekeda Tadika tauka Prasekula ba mengeri tu, beratika sida nitihka SOP ke udah ditetapka nyengkaum pengajar enggau nembiak ngena sengkabung idung enggau mulut, pengangat isi nembiak diperesa lalu sebedau tama ke dalam kelas ,jari diberesi dulu ngena ‘sanitizer’ jari.
Ivy Musang, 37, ke bisi anak beumur 5 taun madahka diri bisi pengirau lalu udah mesan tauka ngelalau anak iya ngambi nitihka SOP ke udah ditetapka.
Ivy madahka anak iya udah dipadah reti tauka kebuah patut nitihka SOP enggau kebuah ti enda besekula ngelama tu.
Berindik ari ti urung lebih tiga bulan enda nurun besekula ku Ivy, pengeransing ati anak iya deka nurun sekula tetap bisi.
“Ati endang bisi irau, semina kitai ngarapka sekula ulih nitihka SOP, ba hari keterubah sehari tu (kemari) aku meda semua ‘OK’.
“Lalu ngagai anak aku empu, endang lama udah aku ngelalau ngambika anang kelalu semak enggau bakih maya dalam kelas, iya ulih mereti laban iya empu madah ketegal koronavirus.
“Taja lama enda besekula iya chukup ransing ati deka nurun sekula,” ku iya maya dikerandau Utusan Borneo lebuh ke nganjung anak iya ngagai kelas Kindy 1 ba Tadika St Joseph ditu, kemari.
Caroline Bong, 38 mega madah diri bisi pengirau tang besampika semua nembiak sereta raban ba Tadika dalam likun enggau pemaik.
Iya madah, taja pan bisi pengirau tang iya lantang ati laban meda anak iya ti beumur 6 taun iya nya dalam kelas Kindy 2 ba Tadika St Joseph ditu ransing ati nurun besekula baru.
Ku iya, anak iya ditangkan ngambika nitihka atur pengajar enggau SOP.
“Bisi irau mimit tang besampika pengelikun semua sida ba Tadika nya.
“Anak aku mega chukup ransing ati nurun besekula, nya ke pemadu beguna, iya nadai lembau taja pan udah lama enda sekula.
“Aku bisi ngelalau iya maya ba sekula tauka tadika, patut nitihka atur pengajar, duduk ba endur diri, ngajar iya chara masu jari ke betul.
Aku madahka iya diatu nyelai ari ke sebedau tu, iya meretika utai dipadah,” ku iya dikerandau Utusan Borneo, kemari.
Berebak enggau tu, Kepala Pengajar Tadika St Joseph, Sister Rowena Patrick lebuh dikerandau, madahka diri puas ati sereta nadai penanggul.
Ku iya, meresa pengangat isi nembiak, meresi jari nembiak ngena sanitizer jari enggau meri tanda basa nadai penanggul ba tadika nya.
“Kebendar meresa pengangat isi, meresi jari ngena sanitizer jari enggau meri tanda basa (ngengkah jari ba baru sereta nundukka mimit pala) nadai penanggul ba nembiak kami laban sida udah teleba, dikemeranka kami kenyau dua taun ke udah.
“Naka ke diatu enggau ke sehari tu (kemari) sida ulih nitihka atur, nadai mayuh penanggul lalu dalam kelas sida duduk ba endur diri sereta ngaga kereja,” ku iya ti meresa pengulih pengajar enggau nembiak nitihka SOP ke udah ditetapka.
Tadika nya mega ngemeran sereta ngemeratka seraka sosial dalam kelas baka takah mija sereta dalam sebuah kelas, pemadu mayuh 13 iku dibandingka enggau ke sebedau tu, pemadu mayuh 25 iku.