SIBU: Serakup Kunteriktor Peranak Menua Kelas F (PERKOF) Sarawak madahka diri pechaya ngagai perintah nengeri enda nisih raban kunteriktor mit,kena nentuka sida bisi disengkaum dalam Projek Transformasyen Menua Pesisir (RTP)
Chairman PERKOF Pampang Kanowit Mohamad Iskandar madah, taja pan perintah apin meri pemutus kena nyidi semua pekara nya, tang iya tetap andalka nasit enggau pengidup dudi hari raban kunteriktor mit tu ila deka dikemeratka, sereta enda tinggal ari orang bukai.
Ku iya, raban serakup tu nganti enggau penuh pengarap senentang perintah deka mansik baru isu pengelunggar ti diberi ngagai Komiti Pemansang enggau Pengelikun Genturung Pendiau (JKKK) di nengeri tu, kena bejalaika RTP ti berega nyentuk RM200,000.
“Endang aruh, pemutus ke pemadu engkeman deka diambi ke pemaik semua raban,” ku iya madah ngagai pengarang berita.
Nitihku Mohamad, bala iya (raban serakup) mega udah nyikap diri ari sukut semua kereja teknikal enggau mekanikal, enti sida diberi peluang enggau dalam projek RTP tu.
Hari Lima empai lama, Mandal Presiden II PERKOF Sarawak Jimbau Galau udah minta perintah ngambika mansik baru pengelunggar ke diberi ngagai JKKK ba nengeri tu, bejalaika projek RTP.
Nya ku Jimbau, raban iya berasai nangi enti sida ngemajakka polisi ke baru nya, tu tau ngujungka raban kunteriktor kelas F deka lenyau projek sereta ngeruga penatai pemisi sida.
“Lebuh polisi pengawa ke baru nya dipejalaika ila, tu baka ti enda meri peluang kelebih agi ngagai raban kunteriktor mit, baka kami tu. Tu ukai pasal bepekit, tang kami dekaka nasit kami mega dikemeratka,” ku iya.
Sebedau tu, Datuk Amar Douglas Uggah Embas madahka JKKK udah diberi pengelunggar bejalaika projek RTP ti berega nyentuk RM200,000.
Ku Uggah, sida (JKKK) dikemendarka ngaga semua projek nya kediri, nengah chara beripai tauka nyiri kunteriktor berejista ti dipilih sida.
Pengelunggar tu ku iya, udah ditetapka dalam aum kabinet nengeri apin lama ke udah.
Berebak enggau tu, sida ulih meresa pengawa nya ke tebal agi projek ti kurang teknikal.