KUCHING: Tadika enggau Prasekula ti dikemendarka beoperasyen baru berengkah sehari tu (1 Julai 2020) pengudah tiga bulan lebih ditutup ketegal Atur Nagang Pemindah (PKP) COVID-19, udah sedia sereta belalauka prosedur operasyen standard (SOP) ti udah ditetapka perintah.
Ba Sarawak bisi 2,865 buah Tadika ti berejista di nengeri ti mungkur 78,225 iku anak mit ti dikemendarka beoperasyen sereta dilalau nitihka SOP ti udah ditetapka sepemanjai Atur Nagang Pemindah Mulaika Pemanah (PKPP).
Kepala Pengajar Tadika St Joseph, Sister Rowena Patrick lebuh dikerandau Utusan Borneo madah, sida udah lama nyikap diri sereta mansik SOP enggau beoperaysen belalauka SOP ke udah ditetapka.
“Sebedau tu pengajar kami udah diberi penerang bekaul enggau SOP sereta apai indai mega udah diberi surat lalau ngambika sida ulih meretika SOP nya.
“Kemari (ensanus) kami belatih baka ni nyambut penatai nembiak awakka raban pengajar nema nama utai ke patut dikereja sida.
“Kami udah besedia sereta nitihka SOP, baka kami naka ke diatu semua ‘ok’ tang sida ari Opis Pelajar Pelilih Menua (PPD) deka bisi datai meresa, kami nganti timbal ari sida,” ku iya.
Tadika St Joseph bisi urung bisi 20 iku pengajar sereta bisi tiga renggat kelas iya nya Prasekula ungkup umur 4 taun, Kindy 1 (5 taun) enggau Kindy 2 ungkup umur 6 taun.
Dulu ari nya, Hanna Alfred siku staf Seksyen Ngatur Pengawa Tadika St Joseph lebuh dikerandau madahka tadika sida iya udah ngaga garis seraka sosial nyengkaum takah mija, kelimpah ari maya penatai nembiak ke sekula pengangat isi deka diperesa enggau jari deka diberesi ngena ai sanitasyen.
Nitih ku iya, tadika nya deka lebih ngemeratka pemeresi nembiak sereta hari bulan lumba enggau main diketuka dulu.
“Enti sebedau tu dalam siti kelas bisi 25 iku tang pengudah kami nusun mija nitihka seraka sosial ke udah ditetapka, pemadu mayuh dalam sebuah kelas bisi 13 iku,” ku iya.
Hanna, berebak enggau tu madahka Tadika St Joseph bisi bejalaika pansik ngagai apai indai nembiak sekalika sida iya nganjung tauka bedau anak ke tadika.
“Pagila (sehari tu) endang bisi nembiak datai tang tebal agi apai indai deka nganjung anak sida dua minggu pengudah tadika beoperasyen reti iya sida berengkah nganjung 14 Julai ila laban sida bedau besedia deka nganjung nitihka ti udah ditimpuhka,” ku iya madah ngagai Utusan Borneo.
Nambahka nya, Menijar Pemansang Operasyen enggau Dagang tadika Smart Reader Malaysia Timur, Norma John madahka semua 19 Tadika Smart Reader Kids di serata Sarawak udah sedia nyambut penatai nembiak beumur 4 ngagai 6 taun sehari tu.
“Kami udah besedia sereta nyikap diri nyengkaum udah meresi enggau munuh igi penyakit, meresi luar enggau dalam tadika, meresi kereban ngajar, nusun perabut dikena nentuka seraka sosial dititihka, meri penerang ngagai apai indai sereta staf tadika pasal SOP Opis Menteri Pelajar.
“Sekeda Tadika Smart Reader Kids mega udah ditukuka nitihka SOP sereta sedia beoperasyen pagila (sehari tu).
“Nitihku Penulung Pemesai Opis Pelajar Pelilih Menua Samarahan (Unit Pelajar Peribit, Sektor Ngatur Sekula) Nor Faizul Saat, Tadika Smart Reader Kids Uni Garden Samarahan nitihka lis SOP ke udah ditetapka perintah,” ku iya madah ngagai Utusan Borneo.
Kelimpah ari nya, Prasekolah Mutiara ba Institut Perguruan Tun Abdul Razak Kota Samarahan (IPGTAR) mega udah nyikap diri nitihka SOP sereta sedia beoperasyen berengkah sehari tu.
Chairman Gerempung Yang DiPertua Gerempung Apai Indai enggau Pengajar Samarahan lebuh ke ngabas prasekula nya madah diri puas ati.
“Kami puas ati laban SOP dititihka,” ku iya seraya disempulang Ketuai Opis ‘Ilmu Pendidikan’ Roha Tamit, Penyelaras Prasekula Mutiasa Zaidah Muhaini enggau pemesai ari IPGTAR.