Anda di sini

RM264.9j deka dikena ngaga padang bilun Bukit Mabong, Bebuling

Advertisement
JAMES MASING
JAMES MASING

KUCHING: Perintah nengeri Sarawak deka ngaga dua buah padang bilun ba Bukit Mabong enggau Bebuling ngena ungkus RM264.9 juta, ti dipelaba deka tembu digaga nyerumba suku ketiga taun 2023.

Sapit Ketua Menteri, Tan Sri Datuk Amar Dr. James Jemut Masing madah, kededua pedang bilun nya deka beroperasyen nyadi Jalai Perengka Pengangkut Langit Menua Pesisir (RAS) ungkup peranak di menua pesisir.

“Kededua Padang Bilun Bukit Mabong enggau Padang Bilun Bebuling deka tembu digaga dalam timpuh 36 bulan lalu pengawa ngaga nya deka berengkah enda lama agi,” ku Masing nengah sebengkah penerang iya kemari.

Pengudah kededua padang bilun nya tembu digaga, nya deka beroperasyen lalu dijaga ari baruh bidang kuasa Opis Penerebai Malaysia (MAVCOM).

Ku iya, pengawa ngaga padang bilun Bukit Mabong di Kapit ke ngembuan pemanjai 790 meter, ulih endur bilun penumpang bansa ‘twin otter’ enggau Cessna 208 ti ulih ngundan pemerat naka 3 tan.

Iya ke mega Menteri Infrastruktur enggau Pemansang Penyangkai Kapal madah, tinda projek ke beungkus RM173.5 juta nya, deka diberi ngagai kunteriktor abis laun kena 15 Julai lalu randau sentang ungkus nya deka dikerandau dalam bulan Ogos ila.

Berebak enggau nya, ‘Surat Anugerah’ (LoA) dipelabaka deka dikeluarka ba tengah bulan September ila.

Padang Bilun Bebuling ke beungkus RM91.4 juta ti benung digaga diatu dipelabaka deka berengkah beroperasyen enda lama agi.

“Dokumen tinda dijangka deka disua ngagai kunteriktor kena 15 Julai begulai enggau Surat Anugerah ke deka dikeluarkan kena ujung bulan Ogos.

“Taja pia, kereja ngepun ngaga Padang Bilun Bebuling ke enda jauh ari Spaoh bisi mar mimit berindik ari gaya tanah ba kandang menua nya.  

“Tu mih pemar ke ditapi kami, tang udah digaga ti nyadi jamin ke pengelikun rayat,” ku iya.

Penyawa nya ku iya, komitmen pengawa perintah nengeri ngangkatka transformasyen ekonomi enggau penyambung di menua pesisir nyengkaum pengelikun servis perengka pengangkut langit di menua pesisir.  

Sebedau tu, palan Padang Bilun Mabong ke lalu balat jauh ari endur mensia mayuh ke ngembuan penyampau tubuh urung 50,000 iku, ti diau ba kandang menua nya, ke sebedau tu bisi penanggul datai jalai.

Padang Bilun Bebuling, dipilih niitihka penerang ari raban orang ke bisi pemerat ba pekara nya, kena ngangkatka servis perengka pengangkut langit ti lalu nyadi indu palan agropolitan Sarawak ba kandang Bukit Sadok.

Ku iya, tu deka mantu ba pengawa ngangkut asil betanam betupi ngambika dieksport ari menua nya.