KUCHING: Gerempung Pengajar Sarawak (STU) meri Selamat Hari Pengajar ngagai semua pengajar ti nyadi pugu penyulut sesebuah menua.
Presiden iya, Macky joseph madah, pengajar bejalaika tanggungpengawa ti chukup besai dalam ngenegapka penemu enggau nempa rebak baru ti setipak enggau Falsafah Pelajar ba Malaysia.
“Nyerumba ngintu Hari pengajar taun tu ti ngena tema ‘Berguru Demi Ilmu, Bina Generasi Baru’ nyata amat nunjukka pengajar nyadi pugu penyulut sesebuah menua.
“Pengawa ngintu Hari pengajar taun tu jauh bida enti dibandingka enggau taun ke udah. Menua kitai agi benung bebendar munaska igi penyakit COVID-19.
Taun tu iya nya taun ti pemadu tusah ditapi raban pengajar berindik ari sekula ti ditutup laban beratka pengelikun sereta pengelantang enggau pemaik raban bansa kelebih agi nembiak maya nagang COVID-19 ari berampit,” ku iya seraya ngarapka semua pengajar terus nyaga pemeresi sereta nitihka SOP ke udah ditetapka ke pengelikun semua.
Iya madahka saup, pemanah pengawa enggau pengawa ke udah dikereja pengajar deka seruran dalam ati genap serak raban bansa.
Pengajar ku iya, nyendiaka pelajar ngena mayuh bengkah platform ngambika nembiak enda tinggal ari pelajar sereta chara gawa ari rumah enggau belajar ari rumah iya nya chara idup baru ti dikemeranka.
“Lalu, penyulut ti diasaika kitai sehari tu udah tentu bisi pemanah pengawa ti dikereja ari pengajar kitai ke dulu suba.
“STU amat temegah ati enggau pengeran ti dipandangka semua pengajar kelebih agi ke enda ngiga pengelelak maya ngereja pengawa enda ngira dini endur.
“STU iya nya sebagi ari ruang bilik pengajar ti chukup temegah enggau penyulut sereta kerejasama ke udah dipandangka,” ku iya.