Anda di sini

KM: Perintah Sarawak seruran nyukung agenda pelajar menua

Advertisement

KUCHING: Perintah Sarawak deka majak nyukung pengawa Perintah Besai nyendiaka ekosistem pelajar kondusif sereta seruran nambah manah perengkaguna sekula di nengeri tu.

Kepala Menteri Datuk Patinggi Abang Johari Tun Openg madah, batang pengawa perintah Sarawak iya nya meri sukung ngagai agenda pelajar menua.

“Enti kurang kitai nambah, enti bisi pematut kitai numbuhka. Ke endang udah dikemisi kitai negapka.

“Semua nya enggau tuju ngambika bediri sama peninggi enggau agenda pelajar ba renggat menua ke pemaik anak Sarawak,” ku iya lebuh bejaku ba pengerami Ngintu Hari Pengajar Renggat Nengeri Sarawak 2020 ditu kemari.

Ku Abang Johari, dalam kabinet perintah nengeri udah numbuhka Opis Menteri Pelajar, Sains enggau Pansik Teknologi kena nambahka kaul perintah Sarawak dalam pemansang pelajar.

Nya ku iya, beguna amat ngambika kualiti pelajar di Sarawak setanding enggau penyulut pelajar menua.

“Dalam pekara tu, paradigma patut seriris, falsafah patut nyata, pengawa dikereja mesti holistik, chara mesti chukup magang,pengingin mesti bepanggai ba ‘Bersatu Kita Teguh, Bercerai Kita Roboh’.

“Aku minta bala pengajar terus bejalaika pengawa enggau penuh dedikasyen sereta berintegriti enda ngira asal enggau bansa pengajar, enda ngira jalai pengarap tauka ideologi,” ku iya.

Ku Abang Johari, profesyen nyadi pengajar amat dikemegahka mensia mayuh laban beguna amat dalam proses ngadaka modal mensia ti deka diguna, kelebih agi Sarawak enggau Malaysia.

Ku iya, setipak enggau program transformasyen ti benung dipejalaika ba renggat menua, pengawa pengajar beguna amat kena nentuka generasyen ke ditempa nengah pelajar menua.

“Kitai patut nemu, pengawa pengajar di sekula diatu ukai semina nyadi pengemudah chara ngiri penemu tang mega nyadi pengiring enggau nempa mensia ke bisi etika, tinggi moral ngembuan pengarap ati ke tegap ngagai Tuhan bepelasarka prinsip Rukun Negara,” ku iya.

Ku iya, proses napi pengawa besemekih ti mayuh pemar enggau majak jampat ngerembai, pengajar patut seruran sedia nerima semua ubah lalu ulih nyadi pengemudah chara ti ngasi dikena ngerembaika pengerindu, penau enggau pengulih nembiak berunding kritis enggau kreatif.

“Setipak enggau pengawa besemekih ba dunya diatu, Transformasyen Pemansang Sarawak udah dilangkar enggau nyata, lalu aku mai raban pengajar meretika juluk ati perintah Sarawak.

“Aku pechaya amat bala pengajar bisi kompetensi ke tinggi, dedikasyen, bisi rintegriti sereta lurus ati bejalaika pengawa ke udah diberi.

“Perintah Sarawak seruran nyukung pengawa manah ke dikereja bala pengajar kena nentuka semua agenda pemansang ulih dikemujur baka ti dikearapka,” ku iya.

Kelimpah ari nya ku iya, perintah Sarawak komited nentuka peneras internet di nengeri ditambah.

Ku iya, nya beguna amat kelebih agi ba pengawa Sarawak ngemujurka ekonomi digital.

“Lebuh ke napi pemar enggau pengawa besemekih global, perintah Sarawak komited ngaga infrastruktur ke bekaul.

“Nya alai, aku minta semua pengajar di Sarawak seruran sedia nerima ubah sereta ngangkatka paradigma diri setipak enggau pinta global diatu,” ku iya.

Bekaul enggau Pengerami Hari Pengajar Renggat Nengeri 2020, Abang Johari madahka nya berambaika leka jaku ‘Berguru Demi Ilmu, Bina Generasi Baru’ nemban amat laban bekaul enggau pengawa pengajar negapka penemu enggau profesionalisme ke deka nempa rebak baru, baka dalam Falsafah Pelajar Menua.

Pengajar ku iya, mensia ti seruran auska penemu sereta enda leju nyikap diri enggau mayuh macham penemu enggau pengelandik setipak enggau prinsip belajar sepemanjai idup.

Sama bisi ngulu pengerami nya Menteri Pelajar, Sains enggau Pansik Teknologi Dato Sri Michael Manyin Jawong enggau Direktor Opis Pelajar Sarawak, Abang Mat Alu Abang Masagus.